Бельгияда премьерге қарсы лаңкестік әрекет жоспарлаған үш күдікті ұсталды

Жергілікті баспасөздің жазуынша, премьер-министр Барт Де Веверге шабуыл жасауды жоспарлаған лаңкестік ұйымның көзі жойылды.

Тергеушілер күдіктілер лаңкестік әрекет жасау үшін ұшқышсыз аппаратқа қосуды жоспарлаған болуы мүмкін қолдан жасалған жарылғыш заттарды анықтады. Тінту Антверпеннің Дерн ауданында жүргізілді.

- Үш жас жігіт (2001, 2002 және 2007 жылы туған, барлығы Антверпенде тұрады) ұсталды, - делінген прокуратура таратқан хабарламада.

Бұл ретте ұсталғандардың ұлты туралы хабарланған жоқ.

Тінту кезінде құзырлы органдар сондай-ақ 3D-принтер мен электронды бөлшектерді тәркіледі.

- Бұл оқиға прокурорлар, полиция және барлау қызметтері террорлық шабуылдар қаупіне қатысты үнемі қырағы болуы керек екенін көрсетеді, - деп мәлімдеді прокуратура.

Бельгияның Сыртқы істер министрі Максим Прево ел премьер-министріне қастандық жасау туралы хабар оны қатты күйзелткенін мәлімдеді.

- Бұл лаңкестік қаупі шынайы болып қала беретінін және біз қырағы болуымыз керек екенін еске салады, - деп жазды дипломат Х әлеуметтік желісінде.

Фламанд ұлтшылы Барт Де Вевер Бельгияның премьер-министрі ретінде осы жылдың ақпан айында елді одан әрі оңға қарай жылжытқан коалициялық келіссөзден кейін ант қабылдаған.

Бұған дейін Германияда қала мэрі пышақ шабуылынан бірнеше жарақат алғанын хабарлаған болатынбыз.