Бес баланы алапат өрт ішінде ажалдан арашалап қалған батыр

Қас-қағым сәтте қасіретті жағдай орын алуы әбден мүмкін еді. Бірақ дәл сол сәтте батылдық пен адамдықтың, жүректілік пен жанашырлықтың шынайы үлгісін көрсеткен қарапайым ғана ауыл тұрғыны Ерлан Тоқсанбаевтың ерлігі сан адамды бейжай қалдырған жоқ, – деп хабарлайды Aikyn.kz порталының тілшісі. 

Құтқарушылар күніне дәл келген бұл оқиғаны кездейсоқтыққа балау да қиын. Ол күні Ерлан Тоқсанбаев ұлы Мираспен бірге шаруашылықтағы жұмыстарын аяқтап, ауыл маңындағы жерлерді тазартып жүрген көрінеді. Сол мезетте бір үйден қою түтін көкке көтерілгенін көреді. Түтінге тұншығып жатқан үйге қарай еш ойланбастан жүгірген жеткен ол отқа оранған үйдің ішінен балалардың дауысын естіп, жанталаса әрекет етуге кірісті. 

 – Терезе жақта тұрған балалар түтінге қақалып, жылап көмек сұрап жатты. Ойланып тұратын уақыт болмады. Терезені сындырып, ішке кіріп, балаларды ұлыма бір-бірлеп беріп жаттым. Жалын үдеп бара жатты. Бірақ артқы бөлмелерде қалып қойған балалардың да дауысы естілді. Сол сәтте бәрін ұмытып, денемді от шарпып жатса да отқа оранған үйге қайта қойып кеттім, – дейді Ерлан Тоқсанбаев.

Ол ең алдымен үйдің ішінде тұрған газ баллонды сыртқа алып шыққан. Араға аз уақыт салып, екінші газ баллоны жарылып кеткен. Бірақ Алла сақтап, балалардың ешқайсысы газға жақын болмаған.

– Қою түтін мен қып-қызыл жалынның арасында әрең жүріп, балаларды тірідей оттан алып шықтық. Өз басым бұл – періштелердің жебеуі болды деп білемін, – дейді Ерлан Тоқсанбаев.

Оқиға болған кезде балалардың ата-анасы үйде болмаған. Көршілерінің айтуынша, анасы ауылдан бірнеше шақырым жердегі демалыс кешенінде жұмыс істейді. Әкелері қызмет бабымен Алматыға кеткен. Абырой болғанда, дәл сол сәтте ауыл арасында шаруамен жүрген Ерлан мен ұлы Мирас дер кезінде көмекке келіп, бес бірдей баланы ажал аузынан арашалап қалған.

Балалар өрттен кейін медициналық және психологиялық қолдауға алынып, әзірге аналарының жұмыс орны ұсынған бөлмеде уақытша тұрып жатыр.

Ерлікті тек марапатпен бағалау жеткіліксіз. Бұл оқиғада Ерлан Тоқсанбаев екінің бірі бара бермейтін тәуекелге барып, от пен жалынның ортасына кіруден тайынбаған. Оның бұл әрекеті – үлкен адамгершіліктің, шексіз жанашырлықтың көрінісі. Әсіресе, бүгінде немқұрайлылық пен бейтараптық белең алып тұрған заманда Ерландай азаматтардың тірлігі – жас ұрпаққа үлгі, қоғамға үміт отын сыйлайтыны сөзсіз.

Ерлік күнделікті өмірде, ешқандай даңғаза да, жарық софит те қажет етпейтін сәтте туады. Ерлан Тоқсанбаевтың батырлығы – дәл соның айғағы. Оның ерлік ісі жергілікті билік пен қоғам тарапынан тиісті бағасын алып, жас ұрпаққа үлгі ретінде кеңінен насихатталуы тиіс. Себебі бір ғана адам – бір ауылдың үмітіне, тіпті елдің ар-намысына айналуы бек мүмкін.

Абзал АЛПЫСБАЙҰЛЫ, Ақмола облысы