Павлодарда белгісіз ер адам үш баланы ажалдан арашалап қалды

Павлодарда жанып жатқан пәтерден үш баланы құтқарып алып, алғыс та күтпестен өз жөнімен кете барған белгісіз қаһарман іздестіріліп жатыр.

Оқиға күндізгі уақытта көпқабатты үйлердің бірінде, тоғызыншы қабатта орналасқан үш бөлмелі пәтерде орын алған. Тұтанған өрт алдымен балконды шарпып, содан кейін қою әрі улы түтін бөлмелердің ішіне кіре бастаған.

Сол сәтте пәтерде үлкендердің қарауынсыз қалған үш бала болған. Олардың ең кішісі 4 жаста болса, үлкендері 8 және 9 жаста еді. Түтінге тұншыққан балалар қорыққанынан жылап, терезеден көмек сұрап айқайлаған.

Көшеде өтіп бара жатқан кездейсоқ жолаушы балалардың шыңғырған дауысын естіп, бірден көмекке ұмтылады. Ол тоғызыншы қабатқа жүгіріп көтерілгенімен, іштегі балалар есікті аша алмаған. Осы кезде ер адам көршілерді көмекке шақырып, самокаттың темір тұтқасымен алдымен құлыпты сындырып, содан кейін теуіп есікті бұзып кіреді.

Ішке енген бойда ол түтін тұмшалаған бөлмелерден балаларды бір-бірлеп сыртқа шығарып, қауіпсіз жерге көшірген.

Төтенше жағдайлар қызметінің мамандары оқиға орнына жеткенде, бүлдіршіндер толықтай қауіпсіз жерде тұрған. Ал балаларды құтқарған ер адам өзін таныстырмастан, өз шаруаларымен кетіп қалған.

Өртсөндірушілер жалынды толықтай ауыздықтап, сөндірді. Оқиға орнына келген дәрігерлер балаларды бірден медициналық тексеруден өткізіп, олардың денсаулығына ешқандай қауіп төніп тұрмағанын растады.

Павлодар облыстық Төтенше жағдайлар департаменті батыл әрекетімен үлкен ерлік көрсеткен азаматты ресми түрде марапаттап, алғыс білдіру үшін оны жан-жақты іздестіріп жатқанын хабарлады.

Департаменттің Мемлекеттік өрт бақылау басқармасы бастығының орынбасары Берік Омаров бұл азаматтың өртті көре сала еш ойланбастан қимылдағанын, тұрғындармен бірлесіп есікті бұзып ашу арқылы үлкен қайғылы жағдайдың алдын алғанын ерекше атап өтті.

Бүгін, 10:49