Білім саласын қаржыландыруда олқылықтар анықталды

1 300-ден астам оқушы бір мектептен екінші мектепке 12 мәрте ауысып отырған. Ал 64 жекеменшік білім мекемесі оқушы саны бойынша екі есе үлкен жүктемемен жұмыс істеп келген.

Бұл оқушы санына бөлінген қаржыны алуды ойлағандардың амалы болуы мүмкін. Сондай-ақ, 167 оқу ордасы кірісін көрсетпей, салық төлеуде салғырттық танытқан. Білім саласын тексерген аудит осындай олқылықты анықтады. Бұл жайлы Премьер-министр Олжас Бектеновтің төрағалығымен өткен білім беру және медициналық ұйымдарды мемлекеттік қаржыландыру жүйесін реформалау жөніндегі жиында айтылды. Алда мұндай заң бұзушылықты болдырмау үшін мектептерді цифрландыру ісі ілгерлейді. Кеңес соңында үкімет басшысы мекемелерді қаржыландыру тетіктерін қайта қарауды тапсырды.