Бірінші жартыжылдықта 10 млрд доллар тікелей шетелдік инвестиция тартылды

АСТАНА, 17 қазан – Sputnik. Бірінші жартыжылдықтың қорытындысы бойынша тікелей шетелдік инвестиция ағыны 10 млрд доллар болды, деп хабарлайды Sputnik Қазақстан үкіметтің баспасөз қызметіне сілтеме жасап.

Бұл туралы қазақстандық делегацияның Fitch, Moody's және S&P ірі рейтинг агенттіктерінің өкілдерімен кездесуінде айтылды.

"2025 жылғы 9 айда негізгі капиталға салынған инвестиция 13,5%-ға артты. Бірінші жартыжылдықтың қорытындысы бойынша тікелей шетелдік инвестиция ағыны $10 млрд құрады. Оның ішінде $6,3 млрд шикізатқа жатпайтын салаға бағытталды", - деп жазылған хабарламада.

Қазақстан үкіметі 2029 жылға қарай ЖІӨ көлемін $450 млрд-қа жеткізу мақсатын қойып отыр, осы ретте белсенді инвестицияны арттырудағы мемлекеттің рөлін одан әрі күшейтуге ниетті.

Одан бөлек бюджет және салық саясатының ауқымды реформасының нәтижесі де таныстырылды. Жаңа Бюджет кодексінде бюджеттің мұнай кірісіне тәуелділігін төмендетуге және шығынды тұрақтандыруға бағытталған контрциклдік екі ереже бекітілген. Олар – Ұлттық қордан кепілдендірілген трансферт көлемі мен республикалық бюджет шығысының өсуін шектеу.