Бишімбаевтың анасы туысын бір миллион долларға жуық ақшаны ұрлады деп айыптады

Астанада бұрынғы министр Қуандық Бишімбаевтың туыстары арасындағы ірі көлемдегі алаяқтық ісі бойынша сот процесі басталды. Іс бойынша басты айыпталушы — Бекзат Кемелова, деп хабарлайды Arasha.kz.

Айыптау нұсқасына сәйкес, Бекзат Кемелова Бишімбаевтың анасы Әльмира Нұрлыбаеваның қолында 990 мың доллар бар екенін білген. Тергеу дерегінше, ол ұлына қатысты тергеу жүріп жатқан кезде психологиялық күйзеліс жағдайындағы Нұрлыбаеваны алдап, «оның артынан Антикор қызметкерлері бақылап жүр, ал ақшаны мемлекет тәркілеуі мүмкін» деген уәж айтқан, деп жазды Orda.kz.

Нұрлыбаева айтқан сөзге сеніп, қаражатты чемоданға салып Кемеловаға тапсырған. Кейіннен айыптау тарабының мәліметінше, Кемелова бұл ақшаны өз пайдасына жаратқан және қайта қайтармаған. Осыған байланысты ол ірі көлемде алаяқтық жасады деп айыпталып отыр.

Айыпталушы тарап бұл нұсқамен келіспейді. Қорғаушы Игорь Вранчевтың айтуынша, бұл іс Бишімбаевтар әулетінің «кек алу әрекеті». Себебі Кемелованың жұбайы — сот-медицина сарапшысы — Салтанат Нүкенованың өліміне қатысты істе Бишімбаевтарға қолайлы қорытынды беруден бас тартқан. Осыдан кейін оның жұбайына қарсы қылмыстық іс қозғалған.

Сот тергеуі жалғасуда.

Айта кетсек, бұған дейін Қуандық Бишімбаевтың ата-анасы Қайрат Кемеловке қарсы «ар-намыс пен қадір-қасиетті қорғау» жөнінде азаматтық талап қойған. Қайрат Кемелов — бұрынғы министрдің әкесі Уалихан Бишімбаевтың немере інісі, яғни Қуандық Бишімбаевтың туысы болып табылады.