Биыл TazaQazBot арқылы 24 мыңнан астам өтінім түсті

Бұл сервис Экология және табиғи ресурстар министрлігі тарапынан қоғамдық бақылауды күшейту және азаматтарды экологиялық мәселелерді шешуге тарту мақсатында құрылған, – деп хабарлайды Aikyn.kz. Платформа ел тұрғындарына әртүрлі экологиялық мәселелер бойынша өтініштер мен шағымдарды жылдам және ыңғайлы жолмен жолдауға мүмкіндік береді. Өтініш беру үшін авторизациядан өтіп, фото тіркеп, мекенжайды көрсетіп, мәселені қысқаша сипаттау жеткілікті.

Барлық өтініштер автоматты түрде тиісті жергілікті атқарушы органдарға жіберіледі. Орындаушылар жұмыс аяқталғаннан кейін фотоесеп беруге міндетті. Пайдаланушы орындалу барысы туралы хабарлама алып отырады, сондай-ақ қызмет сапасын бағалай алады.

Қолданушылар   ыңғайлы болу үшін және жауаптыларды анықтау мақсатында өтініштер 21 санатқа бөлінген, олардың ішінде аумақтарды тазалау, тұрмыстық және құрылыс қалдықтарын шығару, көшелерді абаттандыру, көгалдандыру, жолдарды жөндеу, су айдындарын тазалау және басқа бағыттар бар.

Биылғы жылы чат-бот арқылы 24 314 өтініш түсті, олардың ішінде:
• орындалғаны — 22 489;
• орындалуда — 224;
• тоқтатылғаны — 1 601.

Ең көп көтерілген мәселелер аумақтарды тазалау, тұрмыстық қалдықтарды шығару, көшелерді абаттандыру және жолдарды жөндеу тақырыптары.

@TazaQazBot чат-ботының жұмысы қоғамдық бақылауды күшейтуге, экологиялық мәселелерге жедел әрекет етуге және мемлекеттік органдардың қоршаған ортаны қорғау саласындағы қызметінің ашықтығын арттыруға септігін тигізеді.