Боксшыны бұлай айтуға кім итермеледі? : Жәнібек Әлімханұлының допинг дауына қатысты тың ақпарат айтылды

Кәсіпқой бокс әлемінде аты шығып тұрған Жәнібек Әлімханұлы допинг дауына ілігіп, желтоқсандағы жекпе-жегіне шығудан шеттетілді, – деп хабарлайды Aikyn.kz сайты.

Бірақ көпшіліктің көкейіндегі сұрақ біреу. Оның спорттан гөрі діни риторикаға ден қоюы мен букмекерлік жүйеге ашық қарсы шығуы өзіне «аяқтан шалу» болып тигені ме? Боксшыны даулы мәлімдемелерге итермелеген орта кім және оның мансабына қауіп төндіріп тұрған күш қандай? Бұл туралы журналист Ораз Әлімбек желідегі парағына жазба жариялап, өз пікірін білдірді.

Боксшы Жәнібек Әлімханұлы неге «өзі отырған бұтақты аралап» жатыр?

Неге оның санасын діни түсінік жаулап алды?

Америкада кәсіпқой бокспен шұғылданып жүрген Жәнібек Әлімханұлы 6 желтоқсанға жоспарланған жекпе-жегіне шықпайды. Ресми мәлімет бойынша, оның қанынан допинг табылыпты. Кейбір сарапшылар «спортты уысында ұстап отырған, спортшыларды «жатқызып-тұрғызатын» букмекерлік компаниялар бәс (ставка) тігуге қарсы болған Жәнібектің «аяғынан шалып жатыр» дегенді айтты. Бұл сөздің де жаны бар, өйткені Жәнібек Әлмханұлы жалпы спорт та болсын, басқа жағдайда да болсын, бәс тігуге қарсы болып бірнеше мәлімдеме жасады. Оның қарапайым халықтың қамын күйттеген мәлімдемесінің астарында букмекерлік бизнес «харам» дегенге саятын ой жатыр.

Осы тұста Ж.Әлімханұлы «медалінің екінші бетіне» үңілейікші. Әлемдегі қызық спорттың бәрінде букмекерлік компаниялар басты спонсор. Бумекерлер «Кім жеңеді?», «Қаншасыншы минутта нокаут (гол) болады?» деген мыңдаған сұрақ қойып, миллиондаған адамға бәс (ақша) тіккізеді. Содан миллиондаған доллар қаржы жинайды. Сол қаржының қомақты бөлігін қайтадан жекпе-жек жарыстарға, футбол матчтарын өткізуге бөледі. Тіпті, спортшылардың сыйақы қорына да букмекерлер көп ақша бөледі. Ал боксшы Жәнібек Әлімханұлы шыркөбелек айналып тұрған осы жүйенің дөңгелегіне таяқ тығып тоқтатып тастағысы келеді. Оның бұл қылығы «өзі отырған бұтақты өзі кесіп» тастағандай әрекет. «Аяз би әліңді біл, құмырсқа жолыңды біл» деген сөзді түсінбей қалған сияқты біздің боксшы. Егер Ж.Әлімханұлы бүйте берсе, әлемдік букмекерлік жүйе оны әпсәтте «шайнап-шайнап» спорттың күресініне қарай түкіріп тастайды. Осыны боксшы түсінбей бе?!.

Әрине, Жәнібек Әлімханұлы боксымен ғана шұғылдану керек еді. Ал ол діни түсініктегі уағыз айтып кетті. Осы тұста «Оның санасына діни түсінік тықпалаған кім?» деген сұрақ туындайды. Егер боксшының айналасын қарасақ, бірден Берік Сұлтан деген журналист көзге түседі. Ж.Әлімханұлының әлгі мәлімдемесінің астына Б.Сұлтан «Халықты ойлаған, ұлтына алаңдаған ЧЕМПИОН! Халықтың чемпионы!» деп, одан әрі отқа май құйып, орға итермелегендей пікір жазыпты. Соны көріп, Жәнібекті букмекерлерге қарсы айдап салып жүргендердің бірі осы ма деп қалдым да, одан әрі Жәнібек Әлімханұлының Қазақстандағы спонсорларын іздедім. Сөйтсем, боксшыны қолдаушылардың бірі атақты бизнесмен Кеңес Ракишев екен. Ол да мешіт салып, мешітті әкесінің атымен атаған мұсылманшылығы басым азамат қой. Оның ықпалында қажылықпен шұғылданатын туристік компания бар. Қысқартып айтсақ, Кеңес Ракишев те діни саналы бизнесмендердің қатарына жатады. Қазақта «көршің соқыр болса, бір көзіңді қысып жүр» деген жаман насихат бар ғой. «Боксшы Жәнібек Әлімханұлының санасына да өзі тығыз араласатын ортасы спортқа жат осындай діни нарративті тығып жіберді ме екен...» деп ойға шомып отырмын,-деп жазды Журналист Ораз Әлімбек facebook пaрaқшaсына.