Бөлімшеге жеткізілген: Түркістанда полиция формасын киген баланың видеосы талқыға түсті

АСТАНА, 27 қазан — Sputnik. Түркістанда полиция формасын киіп, аулада жүрген бала мен оның әкесі полиция бөліміне жеткізілді. Оқиғаға қатысты полиция түсініктеме берді.

Әлеуметтік желілерде Түркістан қаласында автокөліктерді тоқтатқан полиция формасындағы баланың бейнежазбасы талқылануда. Бала әкесімен бірге полиция бөліміне жеткізілген.

Әкесі олардың бұл қылығына наразылық білдірген. Айтуынша, полициядағылар баланың планшетін алып қойған. Оқиғаға қатысты желі қолданушыларының бірі "баланың көзінше полицияның мәртебесін түсірді" десе, енді бірі "полиция ескерту жасаса да болар еді" деп жазды.

Оқиғаға қатысты Түркістан облысының полиция департаменті түсініктеме берді.

"Баланы полиция формасын кигені немесе полиция қызметкері болуды армандағаны үшін ешкім жазалаған жоқ. Керісінше, біз балалардың болашағын полиция қызметімен байланыстыруға деген ұмтылысын құптаймыз. Бірақ бұл оқиғада біз мүлдем басқа нәрсе туралы айтып отырмыз", - дейді полиция департаменті.

Олардың айтуынша, бала кешкі уақытта жолға шығып, қозғалыстағы көліктерді тоқтатқан. Сонымен қатар оның әкесі жақын жерде тұрып, не болып жатқанын видеоға түсірген.

"Мұндай әрекеттер баланың өмірі мен денсаулығына қауіп төндіреді. Жүргізушілердің абайсыз қозғалысы қайғылы жағдайға әкелуі мүмкін. Сондықтан полиция араласты. Бала және оның әкесімен профилактикалық әңгіме жүргізілді. Баланың өзіне ешқандай жауапкершілік шаралары қолданылмады", - дейді полиция.

Әкімшілік материал ата-ана міндеттерін тиісінше орындамағаны үшін әкесіне қатысты рәсімделген.

Полиция қызметкері болуды армандау өте жақсы. Бірақ бейнеролик үшін бала өміріне қауіп төндіруге болмайды, дейді Түркістан облысы полиция департаментінің баспасөз қызметі.