Брюссельде Еуропалық одақ саммиті басталды

Бүгін Брюссельде Еуропалық одақ басшыларының екі күндік саммиті басталды.

Бұл соңғы айларда жиі өтіп жатқан ең күрделі әрі жауапты жиындардың бірі болмақ. Бүгін және ертең 27 елдің мемлекет және үкімет басшылары сыртқы саясаттан бастап экономикаға дейінгі маңызды мәселелерді талқылайды.  

Еуроодақ көшбасшылары қорғаныс әлеуетін арттырып, жаңа қауіп- қатерге дайындық мәселесін пысықтап жатыр. Кейінгі  уақытта гибридті шабуылдар көбейді, маңызды инфрақұрылымға төнген қауіп күшейді. Кәрі құрлықтағылар киберқауіпсіздікті дамытып, технологияларды жетілдірмесе және қорғаныс жүйелерін нығайтпаса болмайды деп отыр. Бұдан бөлек күн тәртібінде Еуропа экономикасының бәсекеге қабілеттілігін арттыру, артық бюрократияны азайту, «жасыл» даму бағыты мен цифрлық технологияларды жетілдіру мәселелері тұр.

Фридрих Мерц, Германия канцлері:

- Еуропалық өнеркәсіптің бәсекеге қабілеттілігіне көбірек көңіл бөлуіміз керек. Мәселен, бүгінгі таңғы жаңалықтарда Бельгияда зауыты бар ірі неміс компаниясы 600 жұмыс орнын қысқартатынын хабарлады. Бұл - Еуропа өндірісіндегі қиындықтардың тек бір бөлігі ғана.

Саммиттің тағы бір тақырыбы - Таяу Шығыстағы жағдай. Еуроодақ елдері өңірдің инфрақұрылымын қалпына келтіру және бейбіт тұрғындарға гуманитарлық көмек көрсету жолдарын талқылайды. Сондай-ақ Еуропадағы ең өзекті әлеуметтік мәселе - тұрғын үй бағасы мен оның қолжетімділігі де назардан тыс қалмақ емес.

Педро Санчес, Испания премьер-министрі:  

- Испаниядағы әлеуметтік теңсіздіктің шамамен 60 пайызы тұрғын үйге қолжетімсіздік мәселесінен туындап  отыр. Біз әлеуметтік баспана салуға қаржы бөлуді, тұрғын үйді тек алыпсатарлық мақсатта сатып алуға шектеу қоюды және  проблеманы  шешудің ортақ еуропалық тетіктерін енгізуді ұсынамыз.

Саммит миграция мәселесін де сырт айналып өте алмайды. Көшбасшылар заңсыз көші-қон легінің  алдын алу және босқындарды елдеріне қайтару мүмкіндіктерін қарастырып жатыр. Сарапшылардың пікірінше, бұл жиын Еуроодақтың бірлігі мен келісімін сынға салатын маңызды саммит болмақ. Оның қорытындысы ертең жарияланады.

Авторы: Ғалымжан Қараманұлы