Бұған тек тәрбиесіз, білімсіз ер адам кінәлі демеймін... : Жұлдыз Әбдікәрімова зорлық зомбылық туралы айтты

Актриса Жұлдыз Әбдікәрімова тұрмыстық зорлық-зомбылық туралы пікір білдірді, – деп жазды Aikyn.kz.

Өнер иесі әлеуметтік желідегі парақшасында әйелдер өліміне қатысты оқиғаларға алаңдайтынын жеткізді. Актриса бұл мәселеде ең бастысы адамның адамгершілігі екенін атап өтті.

«Соңғы уақытта жаңалықтар легін қарай алмай жүрмін. Елдің болашағы туралы айтып, келешегімізді талқылап жатқанда, тағы бір ана ажал құшты. Өзге біреуден емес, өзі сүйіп, сеніп, өмірін байлаған жарынан. Қыз баласы үшін өз үйі, өз жары қауіпсіз бола алмаса, біз қандай болашаққа ұмтылып жүрміз? Мен бұған тек тәрбиесіз, білімсіз ер адам кінәлі демеймін. Ерте тұрмыс құрған бойжеткенді де кінәламаймын. Қатыгез қоғамды ғана айыптағым келмейді. Меніңше, мәселе — әр адамның адамдық межесінде. Ардың межесі қандай? Ұяттың межесі ше? Жауапкершіліктің, құрметтің, мейірімнің шегі қайда? Қоғамда, ортамызда, отбасымызда болып жатқан жағдайларға әрқайсымыздың қатысымыз бар. Өйткені қоғам — бізден бөлек тұрған бір ұғым емес. Қоғам — мен, сен, біздің отбасымыз, біздің балаларымыз», - дейді актриса.

Оның айтуынша, әр адам сөзі мен ісіне жауапкершілікпен қарауы тиіс.

«Әлемді өзгерткің келсе, өзіңнен баста дегенді мен ойлап тапқан жоқпын. Ғасырлар бойы ойшыл даналар айтып келеді. Әр ана ұлы мен қызына адамдық пен мейірімді үйретсе, әр ер азамат өз әрекетіне жауап берсе, әр әйел өз сөзі мен ісіне жауапкершілікпен қараса, әр шенеунік атқарып отырған қызметін аманат деп түсінсе, қоғам да біртіндеп өзгерер ма еді? Заң керек. Білім керек. Тәрбие керек. Бірақ олардың бәрінен бұрын, әркім өзінен былай сұраса екен: Менің адамдық межем қандай?» - дейді актриса.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.