Бурабай курорттық аймағында жедел құтқару жасағының стансасы пайдалануға берілді

Нысан Қазақстан Республикасының Төтенше жағдайлар министрі, генерал-лейтенант Шыңғыс Әріновтің қатысуымен пайдалануға берілді, – деп хабарлайды Aikyn.kz.

Бурабай көлі – елдегі ең көп баратын туристік бағыттардың бірі, бұл азаматтардың жаппай демалысы кезеңінде кәсіби құтқару бөлімшелерінің тұрақты болуы мен жедел әрекет етуге жоғары дайындығын талап етеді.

2019 жылы басталған стансаның құрылыс жобасы бүгінде толық көлемде іске асырылды. Нысанды пайдалануға беру курорттық аймақтағы су айдындарында орнықты қауіпсіздік инфрақұрылымын қалыптастыруға бағытталған жоспарлы жұмыстың қорытындысы болды.

Жаңа стансада қызметтік және қосалқы үй-жайлар бар, олар персоналдың тәулік бойы кезекшілік етуін қамтамасыз етеді. Жасалған жағдайлар құтқарушылардың жұмыс тиімділігін арттырып, ықтимал төтенше жағдайларға ден қою уақытын қысқартуға мүмкіндік береді.

Нысанмен танысу барысында ТЖМ басшысы өңір тұрғындары мен қонақтарының қауіпсіздігін қамтамасыз етумен айналысатын бөлімшелердің материалдық-техникалық базасын кезең-кезеңімен дамыту маңыздылығын атап өтті.

Іс-шара аясында бөлімшеге авариялық-құтқару жұмыстарын орындауға арналған арнайы техника тапсырылды, бұл туристік маусымда қызметтің әлеуетін қосымша нығайтады.