Бурабайда құтқару жасағының екі станциясы ашылды

Бурабай курорттық аймағында жедел-құтқару жасағының екі станциясы ашылды.

Оның бірі Үлкен Шабақты, екіншісі Бурабай көлінің жағасында орналасқан. Қос нысанда құтқарушылар тәулік бойы кезекшілік етіп, туристер мен балықшылардың қауіпсіздігін қамтамасыз етеді. Өңірде қыс басталғалы бір балықшы суға кетті.

Ақмола облысында қазір жедел-құтқару жасағының 6 станциясы бар. Оның үшеуі Бурабай ауданында орналасқан. Өйткені, көрікті өлкеге демалуға келетін турист көп. Жаңа станцияларда құтқарушылар үшін барлық жағдай  қарастырылған. 

Талғат Айтбаев, облыстық ТЖД жедел құтқару жасағы бастығының м.а:

- Осыған дейін біздің станциямыз өте ескі еді. Іргетасы 60 жылдары қаланған ғимаратта құтқарушыларға тиісті жағдай қарастырылмады. Қазір міне жаңа нысан іске қосылды. Жалпы мұнда 36 құтқарушы күні-түні кезекшілік етеді. Олар тек суда емес, таулы жерлерде де адамдарға көмек көрсететіндіктен, гидравликалық, альпинистік апаттық-құтқару құралдарымен және қайықтармен жабдықталған.

Қыс басталғалы бері төтенше жағдай қызметінде тыным жоқ. Құтқарушылар су айдындарын аралап, балықшыларға түсіндіру жұмыстарын жүргізеді.

Абзал Азаматұлы, тілші:

- Қыс мезгілінде балық аулаудың өз қызығы бар. Мұны мына отырған балықшылар жақсы біледі. Бірақ қауіпсіздік шараларын естен шығармаған жөн. Жалпы балық аулау үшін мұздың қалындығы кемінде 10 сантимерт болу керек. Егер адам көп болса, онда 15 сантиметрден қалың болғаны абзал.

Сұңғат Ғалым, құтқарушы:

- Біріншіден, олар жылы киінуі қажет. Жылыну үшін ыстық шай алып келуі керек. Сондай-ақ үстінде осындай құтқару жейдесі болғаны дұрыс. Қолында арнайы арқан мен ұзын таяқ болуы керек. Ол арқылы мұздың қалындығы мен терендігін тексеріп отырады. 

Бірақ балықшылар бұл ескертулерді елей бермейді, дейді жауаптылар. Оның салдары қайғылы жағдайға ұласып жатады. Жұқа мұздың үстіне шығып, ойнап жүрген балаларды жиі көресіз.

Ерсайын Қойшыбаев, облыстық ТЖ департаментінің ресми өкілі:

- Біз ата-аналарды балалармен түсіндіру жұмыстарын жүргізуге кеңес береміз. Өйткені көбіне кей балалар сабақтан кейін өзен үстіне шығып ойнағанды жақсы көреді. Қыс келсе қар жамылған кей өзеннің беті толығымен қата қойған жоқ. Сондықтан оның арты қайғылы жағдайға душар етуі мүмкін. 

Жалпы қыс басталғалы өңірде ескертуді елемеген 96 адам жауапкершілікке тартылып, айыппұл төледі.

Абзал Азаматұлы, Виктор Полянный