Бұршақ, дауыл және қараңғылық Ақтөбе табиғи апаттан кейін ес жиюда

Ақтөбе екі күнге созылған қолайсыз ауа райынан кейін қалпына келтіріле бастады. Алдымен қаланы ағаштарды құлатып, аудандарды жарықсыз қалдырған және конструкцияларды жұлып әкеткен алапат дауыл басса, артынша жауған ірі бұршақ бау-бақша мен үйлерге зақым келтірді. Тұрғындар әлеуметтік желілерде қираған нысандар кадрларын жариялап, шығынды есептеп жатыр, деп хабарлайды Tengrinews.kz тілшісі.

Ақтөбе екі күнге созылған қолайсыз ауа райынан кейін қалпына келтіріле бастады. Алдымен қаланы ағаштарды құлатып, аудандарды жарықсыз қалдырған және конструкцияларды жұлып әкеткен алапат дауыл басса, артынша жауған ірі бұршақ бау-бақша мен үйлерге зақым келтірді. Тұрғындар әлеуметтік желілерде қираған нысандар кадрларын жариялап, шығынды есептеп жатыр, деп хабарлайды Tengrinews.kz тілшісі.

Кешегі дауылдан кейін Ақтөбедегі ондаған аула ағаш бұтақтары мен діңдеріне толып қалды. Ресми мәлімет бойынша, облыс орталығында жүзге жуық ағаш құлаған. Жүздеген тұтынушы электр қуатынсыз қалды, ал апаттық қызметтер күшейтілген режимде жұмысын жалғастырып жатыр.

Ал Ақтөбе шетіндегі тұрғындар тағы бір сынаққа тап болды. 22 маусымда күндіз бұл аймақта қатты бұршақ жауды. Көз көргендердің айтуынша, мұз түйіршіктерінің көлемі бөдене жұмыртқасындай болған.

Instagram-дағы бұл жарияланымды көру

НОВОСТИ АКТОБЕ | ZA AKTOBE (@za_aktobe) жарияланымы

Ақтөбеліктердің айтуынша, бұршақ егінді ғана емес, үйлердің қасбетін де зақымдаған.

"Барлық қызанақты жайпап кетті, көшеттерден түк қалмады. Көрші әженің үйінің бүкіл қабырғасын бұршақ зақымдады", – деді видео авторларының бірі.

Дегенмен, ақтөбеліктер кешегі оқиғадан әлі де есеңгіреп отыр. 68 жастағы Наталья Черненко дауыл кезінде үйіне көпжылдық ағаш құлағанын айтады.

Ағаш үйге іргелес салынған құрылыстың үстіне түсіп, шатырдың бір бөлігін зақымдаған. Зейнеткер салдарды өз бетінше жоюға қауқары жетпейтінін айтады.

"Дауыл басталғанда терезеден қарап тұрғанмын. Кенет ағаштың құлап бара жатқанын көрдім. Қатты қорыққанымнан жылап жібердім. Әкімдікке хабарласып, ағашты алып тастауға көмек сұрадым. Бірақ ол жақтағылар мұның бәрін өзіміз реттеуіміз керек екенін айтты", – деп шағымданды зейнеткер.

"Қазгидромет" РМК дерегі бойынша, 21 маусымда желдің екпіні секундына 30 метрге жеткен. Әкімдіктегілер бірінші кезекте жолдар мен тротуарларды бөгеп қалған ағаштар тазаланғанын хабарлады. Қазір жұмыстар аулалар мен тұрғын үй алаптарында жалғасып жатыр.

Жолдың жүру бөлігі мен тротуарларға құлаған ағаштар алынып тасталды, көлік пен жаяу жүргіншілер қозғалысы толық қалпына келтірілді. Қазіргі уақытта коммуналдық қызметтер құлаған ағаштарды аралап, шығару жұмыстарын жүргізіп жатыр. Әкімдік мәліметінше, жалғызбасты зейнеткерлер мен ПИК жоқ аулалардың тұрғындарына да көмек көрсетіліп жатыр - ол жерлерде ағаштарды шығару және аумақтарды тазарту жұмыстары ұйымдастырылған.

Фото Tengrinews.kz

Ағаштардың құлауы бойынша көп жағдай жасыл желегі мол Жилгородок пен Шанхай аудандарында тіркелді. Қазіргі уақытта шағын архитектуралық пішіндерден, маңдайшалар мен ағаштардан қауіп байқалмайды. Азаматтардың жарақат алу деректері тіркелген жоқ", – деп хабарлады Ақтөбе әкімдігі.

Энергетиктер де күшейтілген режимде жұмыс істеп жатыр. Сегіз бригада көше жарығын қалпына келтіру үстінде. Түнде "Энергосистема" ЖШС-нің тағы он бригадасы жұмылдырылды. Атқарылған жұмыстарға қарамастан, тұрғындардың бір бөлігі әлі де жарықсыз отыр.

"Қазіргі уақытта Заречный тұрғын үй алабындағы бірқатар мекенжай мен Жилгородок ауданы бойынша электр энергиясын қалпына келтіру жұмыстары жүргізіліп жатыр. Снайперская көшесінде қалпына келтіру жұмыстары таңға дейін жүргізілді. Нәтижесінде электр қуаты берілді. Дауыл кезінде "Энергосистема" ЖШС және Ақтөбе тұрғын үй-коммуналдық шаруашылық бөлімінің желілері арқылы жарық алатын шамамен 200 тұтынушыға электр энергиясын беру уақытша шектелген болатын", – деп хабарлады энергиямен жабдықтаушы компания.

Табиғаттың дүлей күшіне шағын архитектуралық пішіндер де төтеп бере алмады. Жеті нысан зақымдалған. Олардың бірі кеше әлеуметтік желілерде тез тарап кеткен видеоға түсіп қалған: сәндік глобус бекіткішінен жұлынып кетіп, орталық даңғыл бойымен көліктерге соқтығыса жаздап домалаған.

"Әуежай бойындағы жануарлар мүсіндері құлап қалды. Кеше қала орталығында глобустың құлағанын көрдік. Бұл шағын архитектуралық пішіндер бекітілген жерінен жұлынып кеткен, бірден алынды. Орнына қоюға болатындарын қайта орнаттық. Қалғандарын жөндеуден өткіземіз", – деп түсіндірді Ақтөбедегі Астана ауданы әкімі аппараты ТҮКШ бөлімінің басшысы Мирас Әжібаев.

Ресми мәлімет бойынша, ағаштардың көліктерге құлауының кем дегенде екі жағдайы тіркелген. Бұл ретте шенеуніктер ескертеді: егер көліктер белгіленбеген жерлерге қойылса, иелері сақтандыру төлеміне ғана үміт арта алады.

Абырой болғанда, адам шығыны жоқ. Бірақ ақтөбеліктер қаланы алдымен алапат жел басып, шатырлар қирағанын, көшелер қараңғы болып қалғанын, одан аман қалған дүниені ірі бұршақ жайпап өткен бұл екі күнді әлі ұзақ еске алатын болды.

“Өте тез өтті“. Ақтөбедегі дауыл ағаштарды құлатып, үйлердің бір бөлігін жарықсыз қалдырды

Еске сала кетейік, бұған дейін 21 маусымда түс қайта Ақтөбеде кенет дауыл тұрып, салдарынан ағаштар құлап, бірнеше ауданда жарық өшіп қалғаны хабарланған болатын. Тұрғындар табиғи апат туралы ешқандай ескерту алмағанын айтады.