БҰҰ Газаны қалпына келтіруге қанша қаржы кететінін есептеді

Газа секторындағы атысты тоқтату келісімінен кейін БҰҰ қалпына келтіру жұмыстарын тезірек бастауға шақырды.

Біріккен Ұлттар Ұйымы Даму бағдарламасы (БҰҰДБ) Әкімшілігінің Палестина аумақтарына көмек көрсету жөніндегі арнайы өкілі Яко Силлиерс сейсенбі, 14 қазанда Женевада өткен брифинг барысында қалпына келтіру жұмыстарын бастау үшін соғыс кезінде қираған ғимараттардың үйіндісін тазарту, сондай-ақ 55 миллион тоннадан астам құрылыс қалдықтарын шығару қажет деп мәлімдеген.

– БҰҰ, Еуропалық Одақ және Дүниежүзілік банк бірлесіп жүргізген шығын мен қажеттіліктерді жылдам бағалау есебіне сәйкес, Газаны қалпына келтіру үшін шамамен 70 миллиард доллар (шамамен 61 миллиард еуро – ред.) қажет болады, - деді Силлиерс.

Ол бұл ұйымдарға қирау жердің ауқымын бағалаумен қатар, «бірінші кезекте қай аумақтарды қалпына келтіру керек және күш-жігерді қайда жұмылдыру керек» деген басымдықтарды беру міндеті жүктелгенін айтты.

– Барлық аумақ қайта қалпына келтірілмеуі мүмкін, - деп атап өтті БҰҰ өкілі.

Ол тек алдағы үш жылда Газаны қалпына келтіруге 20 миллиард доллар (17,3 миллиард еуро) жоспарланғанын атап өтті.

Яко Силлиерс Газа секторындағы қалпына келтіру жұмыстарын нақты аяқтау мерзімін айтудан бас тартты. Ол қалпына келтіру мерзімі қаржыландыру көлеміне байланысты болатынын және ондаған жылдарға созылуы мүмкін екенін айтты.

Бұған дейін атысты тоқтату келісімінің бірінші кезеңіне сәйкес Израиль әскерлері шығарылғаннан кейін мыңдаған қоныс аударған палестиналық үйлеріне оралғаны хабарланды.