Бұзуға болмайды қалдыру керек Астанадағы ұзаққа созылған құрылыстардың тағдыры қалай шешілуде

Астанадағы тоқтап қалған құрылыстар мен аяқталмаған тұрғын үй кешендері кейде қала көрінісінің ажырамас бөлігіне айналып кетеді. Алайда нысанның ұзақ уақыт бос тұруы оны міндетті түрде бұзу керек дегенді білдірмейді. Елорда әкімдігі құрылысты қандай жағдайда консервациялау қажет екенін, демонтаж жұмыстары қашан жүргізілетінін және қалада қанша проблемалық нысан қалғанын түсіндірді, деп хабарлайды Tengri Home тілшісі.

Поделиться

Астанадағы тоқтап қалған құрылыстар мен аяқталмаған тұрғын үй кешендері кейде қала көрінісінің ажырамас бөлігіне айналып кетеді. Алайда нысанның ұзақ уақыт бос тұруы оны міндетті түрде бұзу керек дегенді білдірмейді. Елорда әкімдігі құрылысты қандай жағдайда консервациялау қажет екенін, демонтаж жұмыстары қашан жүргізілетінін және қалада қанша проблемалық нысан қалғанын түсіндірді, деп хабарлайды Tengri Home тілшісі.

Құрылыс тоқтап қалса: заң талабы қандай

Астана қаласының Мемлекеттік сәулет-құрылыс бақылау басқармасының мәліметінше, егер нысан құрылысы тоқтатылса немесе алты айдан астам уақытқа кідірсе, құрылыс салушы оны консервациялауға міндетті.

Ведомство өкілдері бұл шара ғимараттың сақталуын және аумақтың қауіпсіздігін қамтамасыз ету үшін қажет екенін түсіндірді.

"Нысан құрылысы бойынша жұмыстар тоқтатылған немесе алты айдан астам мерзімге кідіртілген жағдайда, тапсырыс беруші негізгі конструкциялардың беріктігін, орнықтылығын және сақталуын, сондай-ақ нысанның халық пен қоршаған орта үшін қауіпсіздігін қамтамасыз етуге бағытталған консервациялау жұмыстарын жүргізуге тиіс", – деп хабарлады басқарма.

Бұл ретте әкімдік құрылыс мерзімінің ұзаққа созылуы ғимаратты бұзуға өздігінен негіз бола алмайтынын атап өтті.

"Құрылыс мерзімінің ұзақ болуы немесе құрылыс-монтаждау жұмыстарының тоқтатылуы нысанды бұзу үшін жеке-дара негіз емес", – деп мәлімдеді ведомство.

Нысанды бұзу немесе демонтаждау жұмыстары тек заңды күшіне енген сот шешімі негізінде жүргізіледі.

Астанада қанша заңсыз құрылыс анықталды

Басқарма өз бетінше салынған құрылыстарға қатысты жағдайды да түсіндірді.

Ведомство мәліметінше, 2023-2025 жылдар аралығында елордада көппәтерлі тұрғын үй кешендеріне қатысты 90-ға жуық өз бетінше салынған құрылыс нысаны анықталған. Қазіргі уақытта олардың саны 12-ге дейін қысқарған.

Елордада қанша проблемалық ТҮК қалды

Әкімдік үлестік құрылысқа қатысты ұзаққа созылған нысандар мәселесіне де тоқталды.

Басқарманың мәліметінше, Мемлекет басшысының тапсырмасы бойынша 2025 жылы Астанада 16 мың алданған үлескердің мәселесі толық шешілген. Проблемалық нысандардың құрылысы бюджет қаражаты есебінен аяқталды. Дегенмен, бұл мәселе әлі толық жабылған жоқ.

Қазір қалада үлестік құрылыс бойынша 20 әлеуетті проблемалық нысан бар. Оның ішінде 10 нысан бойынша оларды тұрғын үй-құрылыс кооперативтерінің пайдасына беру туралы шешім шығарылған. Бұл нысандардың құрылысы жеке инвесторларды тарту арқылы аяқталып жатыр.

Тағы 10 нысанды құрылыс салушылардың өздері аяқтап жатыр.

Әкімдік мұндай жобалардың аяқталуы тұрақты бақылауда екенін және тұрғын үй құрылысына үлестік қатысу мәселелері жөніндегі ведомствоаралық комиссия жұмысы аясында қаралатынын мәлімдеді.

Google News арқылы жаңалықтарымызды қадағалаңыз

Жазылу

Астана Құрылыс ТҮК әкімдік