Цифрлық егіздер, ақылды фермалар және агродрондар Тоқаев ауыл шаруашылығын трансформациялау туралы

Президент Қасым-Жомарт Тоқаев Астанада өткен Жоғары Еуразиялық экономикалық кеңес отырысында сөз сөйледі. Мемлекет басшысы Еуразиялық экономикалық одаққа (ЕАЭО) мүше елдердің өнеркәсібі мен агроөнеркәсіптік кешенін цифрлық трансформациялау мәселесіне тоқталды, деп хабарлайды Tengrinews.kz тілшісі.

Президент Қасым-Жомарт Тоқаев Астанада өткен Жоғары Еуразиялық экономикалық кеңес отырысында сөз сөйледі. Мемлекет басшысы Еуразиялық экономикалық одаққа (ЕАЭО) мүше елдердің өнеркәсібі мен агроөнеркәсіптік кешенін цифрлық трансформациялау мәселесіне тоқталды, деп хабарлайды Tengrinews.kz тілшісі.

Президент экономиканы цифрландыру – технологиялық тренд қана емес, бәсекеге қабілетті болудың басты кепілі екенін атап өтті.

"Қазақстан бұл сынаққа ауқымды Цифрлық трансформация тұжырымдасын қабылдау арқылы жүйелі әрекеттермен жауап бермек. Өнеркәсіп секторы мен тау-кен және металлургия кешеніндегі роботтандыру, «бұлттық» шешімдер, ірі кәсіпорындардың «цифрлық телнұсқасы» өнімділікті ұлғайтып, шығынды азайтады. Ауыл шаруашылығын автоматтандыру мол өнім жинауға, су үнемдеуге, қоршаған ортаға зиянды азайтуға септігін тигізеді. Мал шаруашылығына қағаз жүзіндегі құжат айналымынан бас тартып, есептің дәлдігін арттыратын бірқатар цифрлық жүйе енгізілді. Еліміздің түкпір-түкпірінде 650-ден астам «ақылды» фермалар жұмыс істеп тұр", - деді Қасым-Жомарт Тоқаев.

Егін және тұқым шаруашылығында өнімді «егіс даласынан тұтынушы дастарқанына дейін» жеткізу тізбегін қадағалайтын жүйе енгізіліп жатыр

Президент тыңғылықты жоспарлау мен цифрлық болжау мүмкіндіктерін пайдалану нәтижесінде Қазақстанда екінші жыл қатарынан егін бітік шығып, 27 миллион тонна көлемінде астық жиналғанын атап өтті. Ауыл шаруашылығы жерлерін жаппай цифрландыру жұмысы жүргізілуде.

"Агродрондар, жерсеріктік навигациялар мен метеостанция мәліметтері кеңінен қолданыла бастады. Жер телімін пайдалануға беру үдерісі электронды форматқа көшірілді. Дихандар мен шаруаларды мемлекет тарапынан қолдау тетіктері толықтай электрондық форматқа ауысты. Бұл жемқорлық тәуекелдерін азайтады", - деді Тоқаев.

Президент агроөнеркәсіптік кешен саласындағы кооперациялық жобаларды қаржылай қолдау бөлігінде Еуразиялық экономикалық одақ туралы шартқа түзетулер қабылдауды осы жолдағы маңызды қадам деп атады.

"Мұндай технологиялық бастамаларды қаржыландыру көлемін ұлғайту үшін Еуразия даму банкінің мүмкіндіктерін пайдаланған жөн. Құрылғаннан бергі жиырма жыл ішінде аталған қаржы институты еуразиялық интеграцияның тиімді әрі сұранысқа ие құралы екенін дәлелдеді. Біз шағын құрамдағы кездесуде Банктің басқарма төрағасы жасаған мазмұнды баяндаманы тыңдап, оны бекіттік", - деді Мемлекет басшысы.

Анықтама:Жоғары Еуразиялық экономикалық кеңес (ЖЕЭК) - Еуразиялық экономикалық одаққа (ЕАЭО) мүше елдердің мемлекет және үкімет басшыларынан тұратын жоғары басқарушы органы. Ол интеграция стратегиясын айқындайды, даму бағыттарын бекітеді және одақтың барлық елдері үшін міндетті шешімдер қабылдайды.

Еске сала кетейік, 28 мамырда Астанада ЕАЭО-ға мүше елдер басшыларының қатысуымен V Еуразиялық экономикалық форум өтті.