Депутат 2 млрд теңгені жымқырды деп айыпталды

ШҚО мен Абай облыстарында әлеуметтік нысандар құрылысына бөлінген 2 млрд теңгеден астам қаржы жымқырылған, деп хабарлайды Arasha.kz.

Қаржылық мониторинг агенттігінің Шығыс Қазақстан облысы бойынша департаменті «QazConstructions» ЖШС басшылығына қатысты сотқа дейінгі тергеу жүргізіп жатыр. Тергеу Шығыс Қазақстан мен Абай облыстарындағы жеті ауданында 11 әлеуметтік нысанның құрылысына бөлінген бюджет қаражатын жымқыру фактісі бойынша басталған.

Күдіктілердің қатарында компанияның бұрынғы директорының орынбасары және Күршім аудандық мәслихатының депутаты бар.

Бюджет қаражатына салынуы тиіс нысандар халықтың өмір сапасын жақсартып, тұрғындардың бос уақытын тиімді өткізуге бағытталған болатын. Алайда қылмыстық іс-әрекеттердің салдарынан төрт дене шынықтыру-сауықтыру кешені мен жеті ауылды сумен қамтамасыз етуге арналған су жүйелері пайдалануға берілмей қалған.

Тергеу мәліметінше, жымқырылған қаражаттың жалпы сомасы 2 миллиард теңгеден асады. Бұл қаржы күдіктілермен байланысы бар компаниялар арқылы қолма-қол ақшаға айналдырылған.

Қылмыстық жолмен алынған қаражатқа Астанадағы элиталық тұрғын үй кешендерінен пәтерлер, сондай-ақ Lamborghini Urus, Cadillac Escalade, Mercedes маркалы көліктер және асыл тұқымды жылқылар сатып алынған. Аталған мүлікке сот санкциясымен тыйым салынды.

Қазіргі уақытта екі күдікті екі ай мерзімге қамауға алынған, тергеу амалдары жалғасуда.

ҚР Қылмыстық-процестік кодексінің 201-бабына сәйкес өзге ақпарат жариялауға жатпайды.