Десанттық шабуылдау әскері елдегі бірлік пен тұрақтылықты қамтамассыз етуде

6 шілде – Қазақстан Республикасы Қарулы Күштерінде Десанттық-шабуылдау әскерлерінің құрылған күні. Биыл айтулы мерекенің 26 жылдығына орай  Алматы, Қонаев, Талдықорған қалаларында және өзге де гарнизондарда орналасқан әскери бөлімдерде мерекелік іс-шаралар ұйымдастырылды.

Осы уақыт аралығында Десанттық-шабуылдау әскерлері еліміздің Қарулы Күштерінің ең ұтқыр әрі жоғары жауынгерлік әзірлігі бар әскер тектегінің біріне айналды. Жоғарғы Бас қолбасшының резерві ретінде десантшылар елдің егемендігі мен аумақтық тұтастығын қорғауға, қазіргі заманғы қауіп-қатерлерге жедел ден қоюға қабілетті екенін көз жеткізді.

– Жиырма алты жыл ішінде Десанттық-шабуылдау әскерлері Қазақстан Республикасы Қарулы Күштерінің сенімді тірегіне айналды. Бұл – бір емес, бірнеше буын десантшылардың жанқиярлық еңбегі мен дәстүрге адалдығы, жауынгерлік шеберлікті үздіксіз жетілдіруге деген ұмтылысының нәтижесі. Бүгінде біздің әскери қызметшілер заманауи технологияларды оңынан меңгеріп, халықаралық оқу-жаттығулар мен бітімгерлік миссияларға қатысу арқылы қазақстандық десанттың жоғары беделін айшықтап келеді. Сондықтан біздің көк берет иелері әскери ортадағы үздік дәстүрден бой жазбай, Отанға деген адалдығын сақтайтынына сенімдімін, – дейді Десанттық-шабуылдау әскерлерінің қолбасшысы, полковник Махсут Гусейнов.

Бүгінде Десанттық-шабуылдау әскері – ел қауіпсіздігін  асқан жауапкершілікпен сезінетін білікті мамандар жиналған ұжым. Олар өзінің әрбір әркетімен жас әскери қызметшілерге патриотизм мен Әскери антқа деген адалдықты ұлықтайды. Соның арқасында Қазақстан әскерінің жауынгерлік әлеуеті одан әрі нығая түседі. 

Десанттар арасындағы сұр мерген

Атап айтар болсақ, Десанттық-шабуылдау әскерлерінің жеке құрамы ірі халықаралық және республикалық оқу-жаттығуларға, Біріккен Ұлттар Ұйымының бітімгерлік миссияларына қатысу арқылы ұрыс жүргізу тәсілдерін меңгеріп қана қоймай, өзінің жоғары кәсіби даярлық деңгейін дәлелдеп келеді. Мәселен десанттық-шабуылдау әскерлерінің бөлімшелері «Батыл тойтарыс – 2026», «Өзара іс-қимыл – 2026», «Мызғымас бауырластық – 2026», «Орман бауырластығы – 2026» секілді оқу-жаттығуына белсенді қатыса отырып, әскеріміз жауынгерлік шеберлікті жетілдіріп, өңірлік қауіпсіздікті нығайту басымдық бергенін көрсетеді.

Әсіресе, Десанттық-шабуылдау әскерлерінде халықаралық әскери ынтымақтастықты дамытуға ерекше көңіл бөлінеді. Мәселен, еліміздің аумағында Десанттық-шабуылдау әскерлерінің басшылығымен ҰҚШҰ Орталық Азия өңірінің Ұжымдық жедел өрістету күштерімен бірлескен «Шеп – 2026» оқу-жаттығуы және «Бауырластық шыңы – 2026» халықаралық оқу-жаттығуы өткен.

Өз ішіміз де ғана емес, өзге де халықаралық сайысқа қатысқан десанттық-шабуылдау әскеріндегі әскери қызметшілер жеңіс тұғырынан көрініп, өз кәсіби даярлығы жоғары екенін көрсеткен. Сондай сайыстың бірі – Қазақстан Республикасы Қарулы Күштерінің XXIII спартакиадасы аясында Гвардейск гарнизонында өткен АК-3 автоматы мен ПМ-3 тапаншасынан ату бойынша чемпионат. Жарысқа еліміздің Қарулы күштердің барлық түрі мен әскери бөлімдерін таныстырған 14 команданың құрамында 100-ден астам сарбаз қатысты.

Осы жолғы сайыстың артықшылығы – әйелдер арасында Алматы қаласы Райымбек батыр атындағы 38-ші Десанттық-шабуылдау бригадасының тәрбие және идеологиялық жұмыстар жөніндегі рота командирінің орынбасары, сержант Аяжан Әміржанова төртінші рет чемпион атанды. Ол – Қазақстан Республикасының оқ атудан спорт шебері және 2023-2024 жылдардың қорытындысы бойынша Қазақстан Республикасы Қарулы күштерінің үздік спортшысы атанды.

– Десанттық-шабуылдау әскерлерінің намысын қорғау – мен үшін үлкен мәртебе. Сондай сайыстың жеңімпазы атану, тағы бір мәрте растау – абырой. Мұндай жарыстар әскердегі үздік мергендерімен тәжірибе алмаса отырып, өз шеберлігіңді шыңдай түсуге көмектеседі. Сондықтан әскери салада, әсіресе, ар-намыс, жауынгерлік бауырластық пен мінсіз даярлық басты құндылық саналатын Десанттық-шабуылдау әскерінде қызмет ететінімді мақтан тұтамын. Әрбір десантшының жеңісі – қазақстандық десанттың және еліміздің Қарулы күштерінің абыройын арттыруға қосылған үлес, – деді Аяжан Әміржанова.

 Біліктілігін шыңдаған жас десанттар

Жақында 100-ден аса жас десантшы алғашқы парашютпен секіріп, әскердегі дайындығын шыңдай түсті. Мұндай оқу-жаттығуы «Жаңа Іле - Оңтүстік» секіру алаңында Қонаев гарнизонында өтті. Оған десанттық-шабуылдау бригадасының 120-дан астам әскери қызметшісі қатысып, 100-і парашютпен алғаш рет секірді.  Десанттау Ми-17 тікұшағынан 800 метр биіктіктен жүзеге асырылды.

Гвардия майоры Данияр Әбдірахмановтың айтуынша, алғашқы секірудің алдында әскери қызметшілер әуе-десант даярлық курсынан толық өткен.  Ол жерде олар әуе кемесінен шығу тәртібін, парашютті басқаруды, жерге дұрыс қону тәсілін ғана емес, төтенше жағдай кезінде әрекет ету алгоритмін меңгерді. Ал дайындықтың соңғы кезеңінде қауіпсіздік талаптарын сақтау бойынша бақылау нұсқамасы өткізілді.

– Әрбір секірудің алдында жан-жақты дайындық жүргізіледі. Әскери қызметшілер теориялық білімді де, практикалық дағдыны да толық меңгеруі тиіс. Десанттаудың қауіпсіздігі олардың сауатты іс-әрекетіне тікелей байланысты. Сондықтан даярлық бағдарламасын толық әрі сәтті аяқтаса, жеке құрамға парашютпен секіруге рұқсат беріледі, – деді 32363 әскери бөлімінің әуе-десант даярлығы бөлімінің аға офицері, гвардия майоры Данияр Әбдірахманов.

Парашюттан жеке секіру – жас десантшыларға өзін шыңдаудың маңызды кезеңі. Игерген машықтарын тактикалық даярлық барысында жетілдіріліп, әскери қызметшілердің жауынгерлік міндеттерді орындау дайындығын күшейте түседі. Әр сарбаздың өз күшіне деген сенімін қалыптастырып, психологиялық орнықтылық қана емес, топтағы тұрақтылық пен ауызбіршлікке негіз болады. Сол себепті әуе-десант даярлығы Десанттық-шабуылдау әскерлерінің жауынгерлік даярлығындағы негізгі бағыттардың бірі екенін ұмытпаған жөн.