ДСМ: Үнемделген 70,5 млрд теңге халықты тегін дәрі дәрмекпен қамтуға бағытталды

Босатылған қаражат онкологиялық, жүрек-қантамыр және аутоиммундық ауруларды емдеуге арналған 7 инновациялық препаратты тегін дәрілер тізібесіне енгізуге мүмкіндік берді.

2025 жылдың қорытындысы бойынша ауқымды үнемдеуге өндіруші зауыттармен тікелей келісімшарттарға көшу және БҰҰ-ның халықаралық ұйымдары арқылы сатып алуды кеңейтудің есебінен қол жеткізілді.

Сонымен қатар министрлік тегін дәрілік заттардың тізбесін оңтайландырып, өмір сүру ұзақтығына әсер етпейтін 90 тиімсіз позиция мен нозологияны алып тастады. Босатылған лимиттер диспансерлік есепте тұрған пациенттердің дербестендірілген қажеттіліктеріне бағытталды.
Оң динамика 2026 жылы да сақталды, сауда рәсімдерін цифрландырудың есебінен 47 млрд теңге үнемделді.

Дәрілік қауіпсіздікті нығайту мақсатында 2026–2027 жылдары «СҚ-Фармация» бірыңғай дистрибьюторының жеке қоймалар желісін салу жоспарланп отыр. Жеке операторлардың қызметінен бас тарту бюджетте жыл сайын шамамен 1,7 млрд теңгені қосымша үнемдеуге мүмкіндік береді.
Ведомство сапалы импорттық препараттардың нарығына қолжетімділікті де жеңілдетіп отыр. 2026 жылы жеделдетілген тіркеу рәсімі қолданылатын елдер тізіміне (АҚШ, ЕО, Жапония, Ұлыбритания) Түркия мен Оңтүстік Корея қосылады. Бұл ретте сапа бақылауы күшейтілген режимде сақталады: өткен жылы сараптама барысында 112 препараттың стандарттарға сәйкес келмейтіні анықталып, жанама әсерлеріне байланысты 30 тіркеу куәлігінің қолданысы тоқтатылды.
Реформаның маңызды кезеңдерінің бірі — дәрілікзаттарды цифрлық таңбалауды енгізу болды. Бұл дәрі-дәрмек айналымын «көлеңкелі» сектордан шығаруға мүмкіндік берді.
Нәтижесінде бөлшек саудадан түсетін салық түсімдері 24%-ға (қосымша 24 млрд теңге) артты және дәріханаларда тегін берілетін 15 мың қаптаманың қайта сатылуының жолы кесілді.
Биыл биологиялық белсенді қоспаларды (ББҚ) міндетті таңбалауды енгізу, ал 2027 жылдан бастап медициналық бұйымдарды таңбалау жоспарланып отыр.
Дәрі-дәрмек беру процесі «Әлеуметтік әмиян» сервисінің арқасында барынша ашық бола түсті.
Электрондық рецепттер тағайындаулардың шамамен 90%-ын қамтып, пациенттерге қызмет көрсету уақытын екі есеге қысқартты.
Кері байланыс үшін тәулік бойы жұмыс істейтін «1439» байланыс орталығы іске қосылды, онда өтініштерді жедел өңдеу үшін жасанды интеллект элементтерін енгізу жоспарланып отыр.

Осыған дейін Денсаулық сақтау министрлігінің алдағы екі жылда 17 өңірде 49 жаңа бейіндік бөлімше ашатыны туралы жаздық.