Джакартадағы дүбірлі дода

Индонезия астанасы Джаркартада ерлер мен әйелдер арасын­дағы әлем чемпионаты өтіп жатыр. 14 жүлде жиынтығы сарапқа салынатын жарыста еліміздің туы астында алты жерлесіміз өнер көрсетеді.

Коллаж: Kazpravda.kz / Адильбек Тауекелов

Жарыстың 122 жылдық тарихы бар. КСРО дәуірінде бұл спорт түрінен Нелли Ким жасындай жарқылдады. Шымкентте білікті бапкер Владимир Байдиннен тәлім-тәрбие алған спортшы 1974–1979 жылдар аралығында ұйымдастырылған әлем чемпио­наттарында 5 алтын, 4 күміс, 2 қола медаль иеленді. Олимпия ойындарының жеңімпазы Юрий Цапенконың қол астында жаттыққан Наталья Ильенко 1981, 1985 жылдары еркін жат­тығуда алдына жан салмады. Едіге Жаровтың шәкірті Валерий Люкин 1987 жылы бас жүлдені олжаласа, 1991 жылы алтын мен күмісті қанжығасына байлады. Сол кездері Владимир Новиков екі дүркін әлем чемпионы атанды. Одан бөлек, жоғарыда есімдері аталған жерлестеріміз Олимпия ойындарынан бастап, басқа да аса ірі халықаралық жарыстарда мол олжаға кенелді.

1993 жылдан бері еліміздің гимнастары жарыстарға жеке команда ретінде қатыса бастады. 1997 жылы Швейцарияның Лозанна қаласында Сергей Федорченко қолды тіреп жасалатын жаттығуда алдына жан салмай, алтын тұғырға көтерілді. Содан кейін спортшыларымыз түрлі жауапты жарыстарда жақсы нәтиже көрсеткенімен, әлем чемпионаттарында көпке дейін жолдары болмады. Тек 2023 жылы Бельгияның Антверпенінде Милад Каримидің қанжығасы майланып, керме жаттығуында қола медальды еншіледі.

Еліміз құрама командасының бапкерлері Джакартадағы жарыс­та Олимпия ойындарының күміс жүлдегері Нариман Құрбанов пен Милад Каримиге зор сенім артып отыр. Сондай-ақ Дмитрий Патанин, Ильяс Әзизов, Диас Тойшыбек, Зейнолла Ыдырысов өнер көрсетеді. Чемпионат 25 қа­зан­да аяқталады.