ЕАЭО елдерінде халықтың нақты табысы қалай өзгерді?

АСТАНА, 8 сәуір – Sputnik. Өткен жыл Қазақстан азаматтары үшін оңай болған жоқ: 2021 жылдан бері алғаш рет нақты ақшалай табыс өспей, керісінше төмендеді. Табыстың нақты индексі 97,3% болды. Бұл дегеніміз – адамдардың табысы қағаз жүзінде өскенімен, инфляцияның әсерінен оның сатып алу қабілеті 2,7%-ға төмендеді. Бұл деректерді Еуразиялық экономикалық комиссия (ЕЭК) ұсынды, деп жазды Ranking.kz.

2025 жыл бойынша деректер тек екі елге – Қазақстан мен Ресейге қатысты берілген. Ресейде халықтың нақты ақшалай табысы 7,7%-ға өскен. Бұл, әрине, 2024 жылмен салыстырғанда (10,1%) төмен, бірақ жалпы өсім сақталған. Қалған елдер бойынша статистика тек 2021–2024 жылдарды қамтиды. Осы кезеңде Қырғызстанда халықтың нақты табысы тұрақты түрде өскен. Беларусьта көрсеткіш 2022 жылы (98,2%) төмендесе, Арменияда 2021 және 2022 жылдары қатарынан азайған.

"Жалпы алғанда, ауытқуларға қарамастан, ЕАЭО елдерінде нақты табыстың өсу үрдісі сақталып отыр, бірақ елдер арасында айырмашылық айтарлықтай", - деп жазды портал.

Ресей табыстың өсуі бойынша да, көлемі бойынша да көш бастап тұр (өткен жылы 897 АҚШ доллары). Қазақстанда халықтың жан басына шаққандағы табысы соңғы жылы азайып, 449 АҚШ долларын құрады – бұл Ресейден екі есе аз. Қалған ЕАЭО елдері бойынша салыстыру тек 2024 жылмен шектеледі. Ең төмен табыс Армения мен Қырғызстанда тіркелген: сәйкесінше 230 және 130 АҚШ доллары.

Қазақстан Стратегиялық жоспарлау және реформалар агенттігіне қарасты Ұлттық статистика бюросының дерегіне сәйкес, өткен жылдың төртінші тоқсанында халықтың жан басына шаққандағы номиналды ақшалай табысы 254,4 мың теңгені құрады – бұл 2024 жылдың сәйкес кезеңімен салыстырғанда 9,8%-ға жоғары. Алайда жоғары инфляция бұл өсімді толықтай "жойып", одан да көп әсер еткен.

Нақты табыс индексі 2024 жылдың төртінші тоқсанымен салыстырғанда небәрі 97,7% болды. Бұл жалақы өсімі мен өмір сүру құнының артуы арасындағы теңгерімсіздікті көрсетеді.