Елде орман қорын молайту үшін 1,6 млрд көшет отырғызылды

АСТАНА, 20 наурыз – Sputnik. Президенттің елді мекендерге бес жыл ішінде 15 млн ағаш отырғызу жөніндегі тапсырмасы асыра орындалды, деп хабарлайды үкімет.

"Мемлекет басшысының елді мекендердің аумағына 15 млн ағаш отырғызу жөніндегі тапсырмасы бар. Биыл бұл тапсырма алдын ала орындалды, яғни 18 млн ағаш отырғызылды. Аталған жұмыс "Таза Қазақстан" бастамасы аясында одан әрі жалғасатын болады", - деді экология және табиғи ресурстар министрлігі орман және өсімдіктер әлемін өндіру және пайдалану басқармасының басшысы Азамат Әбуов.

Сонымен қатар ведомство 2027 жылға дейін 2 млрд ағаш отырғызу жоспарын орындау мақсатында мемлекеттік орман қорын молайту міндетін жүзеге асырып жатыр. Бүгінгі таңда 1 млн гектардан астам жерге 1,6 млрд көшет отырғызылған.

Қызылорда облысындағы экологиялық ахуалды түзеу үшін Арал теңізінің құрғаған түбінде мелорациялық орман жұмыстарын жүргізу бойынша тапсырма берілген болатын.

Қазір ол жерде 1 миллион гектардан астам аумақта көшеттер отырғызылды. Бұл жұмыстар барысында ғылыми сүймелдеу жолымен жаңа технологиялар қолданылып жатыр.