Павлодарлық оқушы орман қорын көбейтетін жоба ұсынды

Павлодарлық оқушы Кения елінің тәжірибесіне сүйеніп, еліміздің орман қорын көбейтуді мақсат етіп отыр.

Оныншы сыныпта оқитын жас зерттеуші «Таза Қазақстан» бағдарламасы аясында ағаш отырғызу тиімділігін арттырып, бюджет шығынын қырық есеге дейін қысқартуға болады -деп сенеді.

Биыл «Таза Қазақстан» акциясы аясында елімізде екі миллионнан астам ағаш егілді. Алдағы екі жылда бұл көрсеткіш екі миллиардқа жетуі тиіс. Павлодарлық оқушы Аружан Жартыбаеваның айтуынша, оның жобасы бюджет қаражатын айтарлықтай үнемдейді және  тұқымның  өнуі мен өсімдіктердің жерсіну деңгейін  арттырады.

Аружан Жартыбаева, дарынды балаларға арналған №3 гимназияның оқушысы:

-  Таңғажайып жоба Кенияда жүзеге асқан. Біз оны өз елімізде кеңінен қолданғымыз келеді. Капсула дегеніміз жөке ағашының тұқымы. Ол желатин мен көмірден жасалған қорғаныш қабатымен қапталады және өсу стимуляторы  – гетероауксинмен өңделеді.

Тәжірибе барысында үш түрлі  капсула сынақтан өткізілді. Құрамында гетероауксин қосылған капсула тиімділігін көрсетті. Өйткені,  қара топырақта өну көрсеткіші 80 процентке  жеткен. Алғашқы өскіндер 11–12 күнде пайда болған. Әзірге бұл әдіс  тек жөке ағашына қолданылды. Алдағы уақытта жергілікті климатқа төзімді қараған өсіру жоспарланып отыр. Бұл әдістің артықшылығы — арнайы дайындықты қажет етпейді. Капсуланы топырақ бетіне тастау жеткілікті. Ылғал көп болса өне береді.

Бақытгүл Шүкеева, дарынды балаларға арналған №3 гимназияның мұғалімі:

- Біз бұл жобаны бір жыл бұрын қолға алдық. Аружан Қазақстанды гүлденген, көрікті елдердің қатарынан  көргісі келетінін айтты. Бұған көптеген дәлелдер де  келтірді. Оның жобасы елімізде орман қорын ұлғайтуға сеп болады деп ойлаймын. 

Аружан өз қолымен өсірген көшеттерді алдымен мектеп жанындағы алаңдарға егуді жоспарлап отыр. Ол экологиялық жаңашыл жобасының қолдау табарына сенімді. 

Қарлығаш Қасиетова, Дәулет Қошқарбаев, Марат Игіліков