Электр сымы үзіліп, үйдің шатыры құлады : Атырауда ауа райының кесірінен тұрғындардың өміріне қауіп төнді

Атырауда қыстың қатты желі мен көктайғақ салдарынан бірнеше төтенше жағдайлар болды, – деп хабарлайды Aikyn.kz сайты azh.kz сайтына сілтеме жасап.

Қалада электр қуатының үзілуі, тұрғын үйлердің қасбетінің құлауы және шатырлардың көлік үстіне құлауы тіркелді.

Таңертеңгі уақытта табиғи апат салдары қаладағы аудандарда да байқалды. Нұрсая ықшамауданында тұрғын үйлердің бірінің қасбеті құлап, кірпіштер ауланың айналасына шашылған. Алдын ала мәліметтер бойынша, оқиға кезінде маңайда адамдар болмаған, зардап шеккендер жоқ. Тағы бір оқиға Алмагүл ықшамауданында болды. Қатты желдің әсерінен ұшқан металл шатыр Hyundai Elantra маркалы көліктің үстіне құлаған.

– Таңертең шатыр көліктің үстіне құлады, оқиға орнына ТЖ қызметкерлері келді, – деді көлік иесі.

Қатты желден №1 қалалық емхана ғимараты да зардап шекті. Жел шатырды жұлып алып, оның бөліктері көрші тұрғын үйлерге ұшып түскен. Қала көшелерінде электр сымы үзіліп, жерге түскен. Қаланың түрлі аудандарының тұрғындары жерге түсіп, салбырап тұрған сымдар туралы хабарлап жатыр. Бұл жағдай адамдардың өмірі мен денсаулығына қауіп төндіріп отыр.

– Ауа райының нашарлауына байланысты (жаңбыр аралас қар және қатты жел) электр желілерінде апаттық ажырату болды. Ұзақ уақытқа созылатын электр үзілуінің алдын алу мақсатында қызметкерлер күшейтілген режимде жұмыс істеп жатыр, – деп хабарлады «Атырау Жарық» ЖШС.

Келтірілген шығын нақтыланып жатыр. Тұрғындарға сақтық шараларын сақтау, үйлер мен әлсіз бекітілген құрылымдардың жанында көлік қоймау, сондай-ақ қатты жел кезінде сыртқа шығуды шектеу ұсынылады.