Еліміздің көші қон саясаты жаңаша сипат алады

Биыл қаңтардан көші-қон саясаты жаңаша сипат алады.

Шетел азаматтары, соның ішінде этникалық қазақтар алдын ала іріктеуден өтеді. Мемлекеттік тілді білу тесті, цифрлық сауалнама тапсырып, уәкілетті органдардың тексерісі мен әңгімелесуі міндетті болмақ. Премьер-министрдің орынбасары – мәдениет және ақпарат министрі көші-қон саясаты тұжырымдамасының негізгі ережелерін түсіндірді. Аида Балаева мемлекеттік қолдауға үмітті қандастар үшін арнайы тәртіп барын да атап өтті. Олар қандас мәртебесін рәсімдеп, еңбек күші тапшы өңірлерге қоныстану керек. Бұлар Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары. Атамекеніне оралғандармен 5 жылға әлеуметтік келісімшарт жасалады. Мемлекет көшу, баспана және жұмысқа орналасуына жәрдемдеседі. Ал 5 жыл өтпей басқа өңірге көшкен  отбасы, берілген көмекті қайтаруға тиіс болады. Тек қалаған облысыңызға еш қолдаусыз тұрақтай аласыз.

Аида Балаева, ҚР Премьер-министрінің орынбасары – Мәдениет және ақпарат министрі:

- Ең алдымен, біз Қазақстан азаматтарының мүддесін басшылыққа аламыз. Шетелдік жұмыс күші тек нақты кадр тапшылығы бар салаларға ғана тартылады. Көші-қон бағыт-бағдары өңірлер мен нақты жобалардың сұранысына сай қалыптасады. Бұл ретте басты назар «Заң және Тәртіп» қағидатының сақталуына салынатын болады. Заң бәріне ортақ. Сондықтан көші-қон талаптарын бұзғандар жауапкершіліктен сырт айналып кете алмайды. Бұл талап мигранттарға да, жұмыс берушілерге де бірдей қолданылады. Қауіпсіздік елге кіруден бастап, елден шығуға дейін толық қамтамасыз етіледі. Біздің мақсатымыз: Қазақстанға заңды сыйлайтын, мәдениетімізді құрметтейтін адамдардың келуі.