Енді қазақстандықтар бес елде QR код арқылы төлем жасай алады

Кездесу барысында тараптар ұлттық төлем платформалары мен жедел төлем жүйелерін дамыту, сондай-ақ QR-код стандарттарын енгізу тәжірибесімен бөлісті.

"Трансшекаралық төлемдерді дамыту перспективаларына ерекше назар аударылды. Осы бағытта ұлттық жедел төлем жүйелері мен цифрлық валюталардың өзара іс-қимылын ұйымдастыру тәсілдері таныстырылды", – деп хабарлады 2026 жылғы 29 қазанда Қазақстан Ұлттық банкі.

Кездесуге қатысушылар Қазақстанның ұлттық QR-төлем жүйелерін біріктіру туралы ұсынысын қолдады. 2026 жылдың соңына дейін елдер бұл тетікті әзірлеуді жоспарлап отыр.

Бұл Қазақстан, Қырғызстан, Тәжікстан, Өзбекстан және Әзірбайжан тұрғындарына шетелде өз банктерінің үйреншікті мобильді қосымшасы арқылы тауарлар мен қызметтерге ақы төлеуге, сондай-ақ бір-біріне лезде ақша аударуға мүмкіндік береді.

Қазақстан тарапы ақпарат алмасу және цифрлық активтерді реттеу тәсілдері бойынша бірлескен шаралар қабылдау туралы да ұсыныстар жасады.

Сонымен қатар тараптар төлем жүйелерінің сенімді жұмыс істеуін қамтамасыз ету, төлем инфрақұрылымын кибершабуылдардан қорғау, қадағалау саласында жасанды интеллект, SupTech және RegTech технологияларын қолдану, сондай-ақ алаяқтыққа қарсы іс-қимылдың өзекті тәжірибелерін талқылады.