Қазақстаннан Түркияға жүздеген миллион теңгенің алтын чемодандарын алып өтпек болды

Шымкент әуежайында құны 227 миллион теңгеден асатын үш келіге жуық алтынды Қазақстаннан заңсыз шығару әрекетінің жолы кесілді. Бағалы металл шетелдіктердің жүгінен табылды, деп хабарлайды Tengrinews.kz Бас көлік прокуратурасына сілтеме жасап.

Алтынды қалай алып өтпек болған?

Прокуратура мәліметінше, Өзбекстан азаматтары бағалы металды Түркияға заңсыз өткізбек болған.

"Алтынды кедендік бақылаудан жасыру мақсатында оның бөлшектерін чемодандардың ішкі астарына және жүк қаптамаларына салған", - делінген хабарламада.

Барлығы құны 227,8 миллион теңге болатын 2,8 келіге жуық бағалы металл табылды, алтын үкім шыққанға дейін мемлекет пайдасына тәркіленді.

Күдіктілерге халықаралық іздеу жарияланды. Сотқа дейінгі тергеу амалдары жалғасып жатыр.

Еске сала кетейік, бұған дейін Жетісу облысында Қазақстаннан құны 1,5 миллиард теңге болатын 2,6 мың тонна алтын құрамдас кенді заңсыз шығару әрекетінің жолы кесілді.

Қаржылық мониторинг агенттігінің мәліметінше, кедендік құжаттарда шикізат "мыс кені мен концентраттары" ретінде көрсетілген. Бұл оның нақты құрамын жасыруға мүмкіндік берген. Жедел-іздестіру шаралары барысында Шығыс Қазақстан және Алматы облыстарындағы қоймалардан мың тоннадан аса шикізат табылды. Ол ірі көлемді контейнерлерге тиелген.

Бізді Google-дың негізгі дереккөздер тізіміне қосыңыз