Ұлттық ұланның қару жарақ қатары отандық Барыс техникасымен толықты

Алатау қаласында ҚР ІІМ Ұлттық ұланының 6654 әскери бөлімінің базасында отандық «Барыс 6х6» броньды дөңгелекті машинасын пайдалану бойынша оқу курсы өтіп жатыр,  –  деп хабарлайды Aikyn.kz сайты Ұлттық ұланның баспасөз қызметіне сілтеме жасап.

Оған Алматы, Түркістан және Қостанай қалаларындағы әскери бөлімдерден, сондай-ақ Петропавлдағы Ұлттық ұлан Академиясынан келген механик-жүргізушілер мен көздеуші-операторлар қатысып жатыр.

Полигонда механик-жүргізушілер броньды машинаны күрделі жер бедері мен жолсыз жерлерде басқару дағдыларын жетілдіруде. Практикалық сабақтар барысында олар маневр жасау, қозғалыс бағытын дұрыс таңдау және кедір-бұдырлы жолдардан өту тәсілдерін пысықтайды.
Ал көздеуші-операторлар машинаның құрылымын, орнатылған жабдықтардың мақсатын және борттық жүйелерді пайдалану ерекшеліктерін зерделеуде. Бұл дайындық әскери қызметшілерге жаңа техникамен жұмыс істеу үшін қажетті білім алуға мүмкіндік береді.

Курс аяқталған соң әскери қызметшілерге броньды машинаны игеру бойынша даярлықтан өткенін растайтын сертификаттар табысталады. Қараша айының басында «Батыс» өңірлік қолбасшылығында да осындай оқу жиынын өткізу жоспарда бар.
Экипаждарды даярлау ұландықтардың кәсіби дағдыларын жетілдіруге және олардың қызметтік-жауынгерлік міндеттерді орындауға әзірлігін арттыруға бағытталған.