Құрбандар саны 74 ке дейін өсті. Тергеушілерге Испаниядағы пойыз диспетчерлерінің іс әрекеті түсініксіз

Испания теміржол апатынан қаза тапқандарды аза тұтып жатыр, құрбандар саны 74-ке жетті. Көптеген адам әлі де ауруханаларда жатыр, деп хабарлайды Tengrinews.kz тілшісі Euronews сайтына сілтеме жасап.

Елдің Көлік министрлігі сәрсенбі күні таңертең болған апаттың себептерін тексеруді жалғастырып жатыр: Мадридтен Севильяға бағыт алған пойыз Толедо провинциясында тоқтап тұрған құрамға бар жылдамдығымен соғылған.

Аудиожазбаларға қарағанда, пойыз машинисі бағдаршамның қызыл түсіне және небәрі 25 шақырым алда басқа пойыздың тұрғанына қарамастан, диспетчерлерден қозғалысқа рұқсат алған.

Бұған дейін Испанияның көлік министрі диспетчерлік топтың әрекетін мүлдем түсініксіз деп атап, сәрсенбі күні таңертең жолдың бұл учаскесінде қозғалысты басқару жүйесінде іркіліс тіркелгенін нақтылады.

Хаттама бойынша, мұндай жағдайда жағдайды бақылау мамандар тобына өтеді. Сарапшылардың пікірінше, диспетчерлердің қатені түсініп, қозғалыстағы құрамды тоқтатуға уақыты болған, бірақ олар белгісіз себептермен бұлай істемеген.

Тергеушілер оқиғаның мән-жайын анықтап, диспетчерлерде қауіп туралы толық ақпараттың болған-болмағанын тексеруі тиіс. Сонымен қатар қолданыстағы хаттамалардың сақталуы және дабыл жүйесі істен шыққан кезде олардың пойыздар қозғалысын қаншалықты тиімді қорғайтыны туралы мәселе де қарастырылып жатыр.

Апатқа ұшыраған құрамдарда барлығы 540 адам болған. Аман қалғандар соққының жойқын болғанын, тік болып көтерілген рельс сынықтары пойыздың төбесін тесіп өткенін айтады.

Испанияда үш күндік аза тұту жарияланды. Толедодағы қасірет бір жыл ішіндегі теміржолда болған үшінші адам өліміне әкелген апат болды, бұл елдің көлік желісінің қауіпсіздігіне қатысты сұрақтар туғызып отыр. Осы жағдайға байланысты машинистер кәсіподағы ереуіл жариялады, ал Мадридте көлік министрінің отставкасын талап еткен митинг өтті.

Испания Еуропалық Одақ елдерінің ішіндегі ең ұзын жоғары жылдамдықты теміржол желісіне ие. Испания үкіметінің басшысы Педро Санчес оқиғаны мұқият тергеп, кінәлілерді жауапқа тартуға шақырды.

Бізді Google-дың негізгі дереккөздер тізіміне қосыңыз