​Энергетика министрлігі Атырау Самара арқылы мұнай экспорты бойынша мәлімдеме жасады

Қазақстан Ресейдегі мұнай құбыры инфрақұрылымы нысандарына жасалған ұшқышсыз аппараттар шабуылынан кейін Атырау – Самара магистральдық мұнай құбыры арқылы мұнай айдауды қайта бастады. Бұл туралы Энергетика министрінің кеңесшісі — ведомствоның ресми өкілі Әсел Серікпаева хабарлады.

3 қарашадағы жағдай бойынша мұнай құбыры штаттық режимде жұмыс істеп тұр.

«Техникалық тексеруден кейін мұнай айдау қайта басталды. Еске сала кетейік, 2 қараша күні таңертең Самара торабы (РФ) нысандарына ҰАА шабуылына байланысты мұнай қабылдау уақытша тоқтатылған болатын. Зардап шеккендер жоқ. Жағдай ҚР Энергетика министрлігінің бақылауында», — деп түсіндірді Әсел Серікпаева.

Қазақстандық шикізатты қабылдау 2 қарашада Мәскеу уақытымен сағат 04:09-да Самара өндірістік-диспетчерлік торабына дрон шабуылы салдарынан мәжбүрлі түрде тоқтатылған еді.

«Самара» станциясы «Транснефть» ЖАҚ-на тиесілі. Осы торап арқылы Қазақстан мұнайы сыртқы нарыққа одан әрі экспортталу үшін Ресейдің құбыр жүйесіне айдалады.

3 қараша, 11:25