Энергетика министрлігі КҚК терминалындағы танкерге шабуыл туралы: экспорттық ресурстарға зиян келген жоқ

Министрліктің баспасөз қызметінің хабарлауынша, Мальта туымен жүрген «Matilda» танкерінің «ҚазМұнайГаз» ұлттық компаниясының қосалқы ұйымы арқылы жалға алынғаны және ҰҰА шабуылына ұшырағаны расталды. Кемеде жарылыс тіркелгенімен, өрт шықпаған. Экипаж арасында зардап шеккендер жоқ. Техникалық қызметтердің алдын ала бағалауына сәйкес, танкер теңізде жүзуге қабілетті, кеменің корпусында аса қауіпті зақымданулар анықталмаған.

Либерия туымен жүрген «Delta Harmony» танкері де жүктеу жұмыстарына дайындық кезеңінде ұшқышсыз ұшу аппараты шабуылына ұшырағаны расталды.

Салдарынан өрт шығып, жедел сөндірілген. Экипаж мүшелері зардап шеккен жоқ. Оперативтік штаб деректеріне сәйкес, оқиға кезінде кемеге мұнай тиеу жұмыстары жүргізілмеген, жүк цистерналары бос болғандықтан, Қазақстан Республикасының экспорттық ресурстарына зиян келтірілмеген.

Энергетика министрлігі логистикалық тізбектердің қауіпсіздігін қамтамасыз ету және экспорттық жеткізілімдердің үздіксіз жұмысын қамтамасыз ету мақсатында «ҚазМұнайГаз» ұлттық операторымен, консорциум әкімшілігімен және кемелер иелерімен іс-қимылдарды жедел түрде үйлестіріп отыр.

Мұнай өндіру және экспорт көлемдеріне қатысты

Энергетика министрлігі желтоқсан айында КҚК теңіз терминалы арқылы мұнай жөнелту көлемінің уақытша төмендегенін растайды. Аталған жағдай ҰҰА шабуылы салдарынан ВПУ-3 айлақ құрылғысының қызметін мәжүрлі тоқтатуына және Қара теңіз акваториясындағы қолайсыз метеорологиялық ахуалға (дауылды құбылыстар) байланысты орын алды. 

Объективті факторлардың салаға әсерін барынша азайту және мұнай өндірудің тоқтап қалуына жол бермеу үшін ведомство экспорттық ағындарды жедел түрде қайта бөлу жөнінде тиісті шаралар қабылдады.

Мұнай көлемінің бір бөлігі баламалы тасымалдау бағыттарына қайта бағдарланды. Атап айтқанда, Атырау–Самара бағыты бойынша тасымалдау көлемінің өскені және Қытай Халық Республикасына жеткізілімдердің артқаны тіркелді. Қалған экспорттық бағыттар бойынша тасымалдау орташа жоспарлы көрсеткіштер деңгейінде сақталды. Жағдай уәкілетті органның тұрақты бақылауында.

Осыған дейін ҚазМұнайГаз КҚК терминалындағы танкерге жасалған шабуылға қатысты пікір білдірген болатын.