Есепке жүйрік оқушы

Qazaq24.com, Egemen.KZ дереккөзінен алынған мәліметтерге сүйене отырып жаңалық жариялады..

Павлодарлық 7-сынып оқушысы Имран Кусанов республикалық олимпиаданың ең жас жеңімпазы атанды. Оның математика мен бағдарламалауға қызығушылығы бастауыш сыныптан-ақ байқалған. Қарапайым ойын ретінде басталған әуестік уақыт өте келе нақты мақсатқа айналып, жас өрен күні кеше республикалық Ауыл олимпиадасында информатика пәнінен бірінші орын жеңіп алды.

Бір қызығы, Имран бұл сайыста өзінен екі жас үлкен балалармен, яғни 9-сынып оқушыларымен қатар сынға түсіп, жасына қарамастан үздік атанды. Қазылар алқасы оның тапсырма шешудегі алғырлығын айрықша атап өтті.

Имранның жақындары оның есепке құмарлығы ерте оянғанын айтады. Бастауыш сыныптан бастап ол түрлі логикалық тапсырмаларға қызығып, математикалық есептерді өзгеше тәсілмен шешуге тырысыпты. Кейін информатика пәнімен жақынырақ танысқан соң, оның қызығушылығы тіпті арта түскен. Алгоритмдік ойлау, «Есепті қалай жеңілдетуге болады?», «Артық қадамды қалай қысқартуға болады?» деген сұрақтар жас оқушының күнделікті дағдысына айналған. Информатикадағы алғырлығы да осы тұста байқалды. Бір қарағанда күрделі көрінетін алгоритмдік есептерді ол бірнеше қадамға бөліп, логикасын тез табады. Мұндай қабілет – тек пәнге қызығушылықтың белгісі ғана емес, жүйелі ойлау мен талдау мәдениетінің қалыптасқанын көрсетеді.

Жас дарынның айтуынша, жарыс оған тек білімін тексеруге ғана емес, өзін дамытуға да үлкен серпін берген.

«Мен ұстазыммен күнделікті дайындаламын. Олимпиадада алгоритмдік есептер, деректермен жұмыс және бағдарламалық шешімдер әзірлеу сынды күрделі тапсырмалар беріледі. Әр кезең мен үшін қызықты болды, тапсырмалар күрделенген сайын өзімді дамытуға ұмтылдым», дейді Имран Кусанов.

Имранның жетекшісі, информатика пәнінің мұғалімі Соян Ертайдың бұл салада 18 жылдық тәжірибесі бар. Жалпы, информатика олимпиадалары тек бағдарламалау тілін білуге ғана емес, логикаға, есепті дұрыс шешуге, шартты талдап, шешімді жоспарлауға үйретеді. Сондықтан мұндай сайыстар жасөспірімнің ойлау мәдениетін қалыптастыруда үлкен мектеп іспетті.

Имранның жетістігін одан әрі айшықтайтын тұс – оның бұл олимпиадаға 5-сыныптан бері үзбей қатысып келе жатқаны. Жоғары сыныптардың есептерін шешіп көру, өзінен мықты қарсыластардың деңгейін бағамдау – бәрі тәжірибені молайтқан. Бұған дейін ол 2-ші, 3-ші орындарды иеленіп, бірнеше мәрте жеңіс тұғырынан көрінген. Демек, Ауыл олимпиадасындағы бірінші орын – бірнеше жылғы үздіксіз ізденістің жемісі.

Имранның жеңісі ауыл және өңір оқушылары үшін де үлкен үлгі. Қазіргі заманда информатика – жай пән емес, болашақ мамандықтардың тілі. Ал ерте жастан алгоритмге, бағдарламалауға машықтанған оқушы инженерия, деректер ғылымы, роботтехника, киберқауіпсіздік немесе білім технологиялары саласында өз орнын таба алады. Ең қуантатыны – мұндай жетістік ауыл оқушысының мүмкіндігі шектеулі деген түсінікті жоққа шығарады. Керісінше, дұрыс бағыт, үздіксіз еңбек және қолдаушы ұстаз болса, сапалы нәтиже де болмақ.

Соңғы жаңалықтар