Еуроодақ украиналықтар үшін уақытша қорғау ұсынуды шектеді

АСТАНА, 6 тамыз – Sputnik. Еуропалық Одақ әскери қызметтен босатылмаған украиналықтар үшін уақытша қорғау ұсынуды шектеп жатыр, деп мәлімдеді Ресей Сыртқы істер министрлігінің Еуропалық істер департаментінің директоры Владислав Масленников.

Ол Еуропада украин әскеріне шақырылғандар уақытша қорғауға құқылы жаңа өтініш берушілер тізімінен алынып тасталғанын айтты.

"Мұндай қадамның мақсаттары айқын және шайқас алаңындағы жағдай Украинаның пайдасына өзгеріп жатқаны туралы тараған әңгімелерді жоққа шығарады", - деді Масленников "Известия" газетіне.

Оның пікірінше, Еуроодақ нақты жағдайды түсінеді және Украина Қарулы күштерін жеңілістен құтқаруға тырысып жатыр.

"Еуроодақ басшылығы нақты жағдайды біле отырып, Киев режимін сақтап қалу және Украина Қарулы күштерін күйретпеу үшін қолдан келгеннің бәрін жасап жатыр. Батыстың қару-жарақпен қамтамасыз етуінің өзі жеткіліксіз екені анық; Украинаға шұғыл түрде адами ресурстар қажет", - деді ол.

Бұған дейін Еуроодақ Кеңесі әскери қызмет жасына жеткен және осы жылдың 31 шілдесінен бастап Еуроодақ елдерінде уақытша қорғауға жаңадан өтініш берген украиналықтардан әскери қызметін растайтын құжат ұсынуды талап еткен. Мұндай дәлелсіз Украина азаматтарының бұл санатына қорғау енді берілмейді. Шешім 4 тамызда Ресми журналда жарияланды және кері күшіне енді.