Еуропада теміржол бойында қылмыс көбейді

Әлемнің бірқатар елінде теміржол бойы жолаушылар үшін қауіпті болып барады. Ресми деректерге қарағанда Германияда кейінгі бес жылда қылмыс саны 51% артқан. Мамандар жағдайды халық санының қарқынды өсуі және қоғамдық орындарды бақылаудың төмендеуімен байланыстырады.

Еуропада теміржол желілерінде қылмыс деңгейі күрт өсті. Қауіпсіздік мәселесі әсіресе Германияда күрделеніп отыр. Сарапшылардың айтуынша, бұзақылық, ұрлық, зорлық-зомбылық, тіпті кісі өлтіру деректері жиілеген.

Полиция мәліметі бойынша қылмыскерлердің 79%-і ер адамдар. Олардың жартысы дерлік қылмыс жасаған сәтте мас күйінде немесе есірткінің әсерінде болған. Сонымен қатар күдіктілердің 53%-і өзге елден келген мигранттар.

Мануэль Остерманн, Федералды полиция одағы төрағасының орынбасары:

- Мәліметтер елдегі ахуалдың мәз емес екенін көрсетеді. Кейінгі уақытта зорлық-зомбылық пен қаруға қатысты заңсыз әрекеттер жиілеп кеткен. Құқықбұзушылықтың негізгі бөлігін ер адамдар мен мигранттар жасайды.

АҚШ-та бірнеше ай бұрын тіркелген оқиға әлемді дүр сілкіндірген еді. Солтүстік Каролинада пойыз ішінде бейтаныс адам 23 жастағы Ирина Заруцкаяға бірнеше мәрте пышақ салған сәті камераға түсіп қалған. Оқиға қоғам арасында үлкен дау тудырды. АҚШ президенті Дональд Трамп бұл оқиғаға қатысты пікір білдіріп, қылмыскерге ең ауыр жаза қолдануды талап еткен еді.

Дональд Трамп, АҚШ президенті:

- Қоғамда қауіпті адамдар бар. Оларға қарсы тұру – біздің міндетіміз. Қылмыскер тез арада сотталып, тек өлім жазасына кесілуі керек.

Ұқсас жағдай Ұлыбританияда да орын алған. Онда пойызда бейтаныс екі ер адам суық қаруды пайдаланып, жолаушыларға шабуыл жасаған. Нәтижесінде 10 шақты адам ауыр дене жарақатымен ауруханаға жеткізілді. Елде тек өткен жылдың өзінде 50 мыңнан аса адам суық қарудың құрбаны болған. Әсіресе ас үй пышағын қару ретінде пайдаланатындар көп.

Иветт Купер, Ұлыбритания ішкі істер министрі:

- Қауіпті қарудың интернет арқылы еркін сатылуы – дабыл қағарлық мәселе. Бұндай әрекеттер тіпті жасөспірімдер арасында да жиілеген. Тауарды жеткізуші көбіне пышақты есіктің алдына тастап кете салады. Мұндай жағдайларды түп-тамырымен жоюымыз керек.

Әлемде қылмыстың алдын алу үшін әртүрлі шаралар қолға алынды. Бірқатар мемлекетте бейнебақылау камералары орнатылып, қауіпсіздік қызметкерлерінің саны көбейген. Қазірдің өзі Германияда 11 000-нан астам камера орнатылды. Сондай-ақ елде тексеріс шаралары күшейтілді. Алайда билік мұнымен шектелмейді. Қосымша қауіпсіздік шараларын енгізуді көздеп отыр.

Авторы: Динара Орынтай