Еуропалық орталық банк басшысы мерзімінен бұрын отставкаға кету туралы қауесетке жауап берді

Оның айтуынша, «негізгі жоспары» – 2027 жылдың қазан айында аяқталатын президенттік мерзімінің соңына дейін қызметін жалғастыру.

— Біз көп жетістікке жеттік, мен де өз үлесімді қостым деп ойлаймын. Қол жеткізген нәтижелерді нығайтып, олардың берік әрі сенімді болуын қамтамасыз етуіміз қажет. Бұл менің мерзімімнің соңына дейін уақытты талап етеді, — деді ол The Wall Street Journal газетіне берген сұхбатында.

Бұл мәлімдеме Financial Times басылымында жарияланған, «оның көзқарастарымен таныс дереккөзге» сілтеме жасаған мақала шыққаннан екі күн өткен соң жасалды. Аталған материалда Лагардтың мерзімінен бұрын кетуі мүмкін деген болжам айтылған еді.

Мақалада сондай-ақ ЕОБ-тың келесі президентін тағайындау үдерісі жеделдетілуі мүмкін екені, бұл Францияда ықтимал әсіре оңшыл президенттің бұл шешімге ықпал ету мүмкіндігін шектеу үшін жасалуы ықтимал екені жазылған. Қазіргі Франция президенті Эмманюэль Макрон келесі жылдың сәуір айында қызметінен кетуі тиіс.

Лагард саяси ықпал арқылы ЕОБ тәуелсіздігіне нұқсан келтіруі мүмкін деген жорамалдарды жоққа шығарды.

— ЕОБ – беделді әрі сенімді ұйым. Мен оның жұмысына өз үлесімді қостым деп үміттенемін, — деді ол.

Кристин Лагард 2019 жылғы 1 қарашадан бері Еуропалық орталық банкті басқарады. Оның өкілеттік мерзімі 8 жылға есептелген және 2027 жылдың қазанында аяқталады.