Еуропалық шенеуніктер АҚШ қа кіре алмайды

АҚШ пен Еуроодақ арасында тағы да дау шықты. Бұл жолы тараптар интернетті реттеу мәселесін келісе алмай отыр. 

Дональд Трамп үшінші мемлекеттерді қойып, енді еуропалық шенеуніктерге виза беруге тыйым салды. Оған себеп – кәрі құрлық елдері қабылдаған цифрлық қызметтер туралы заң. Вашингтонның мәлімдемесіне қарағанда, құжат сөз бостандығын шектеп, америкалық технологиялық компаниялардың құқығын таптайды. Цифрлық қызметтер туралы заңның басты мақсаты – желі қолданушыларын жалған ақпараттан, заңсыз контенттен қорғау.

Еуропалық шенеуніктер АҚШ-қа кіре алмайды

АҚШ цифрлық қызметтер туралы заңды әзірлеп, құжатты қабылдауға қатысы бар 5 шенеунікке қатысты визалық санкциялар енгізді. Тізімде ішкі нарық және қызметтер жөніндегі бұрынғы еуропалық комиссар Тьерри Бретон бар. Онлайн-платформаларды бақылайтын ережелерге сәйкес, әлеуметтік желілер заңсыз контентті тез арада өшіріп, реттеуші алдында есеп беріп отыруға тиіс. Егер ережені бұзса платформалар жаһандық айналымнан 6%-ға дейін айыппұл төлейді. Ал ірі технологиялық  платфрмалардың барлығы дерлік АҚШ-қа тиесілі. Брюссель мен Вашингтон арасындағы кикілжіңге осы себеп. Вашингтон Еуропаны америкалық технологиялық компаниялардың жұмысына кедергі келтіріп, сөз бостандығын шектеді деп айыптап отыр.

Марко Рубио, АҚШ Мемлекеттік кеңесшісі:

- Еуропалықтар тым ұзақ уақыт бойы ұйымдасқан түрде америкалық платформаларды өздері келіспейтін америкалық көзқарасты жазалауға мәжбүрлеп келді. Трамп әкімшілігі бұдан былай мұндай сорақы әрекеттерге көніп отырмайды. Бүгін мемлекеттік департамент жаһандық «индустриалды цензура кешенінің» жетекші фигуранттарына АҚШ-қа кіруге тыйым салу үшін шаралар қабылдайды. Өзгелер де осы бағыттан таймаса, бұл тізім әлі де кеңейеді.

Алайда Еуропа мұнымен келіспейді. АҚШ-тың бұл шешімін сынға алып, бірқатар мемлекет қарсылығын білдірді. Бұған дейін Дональд Трамп америкалық компанияларға зиянын тигізетін мемлекеттерге жаңа тарифтер енгізетінін ескерткен еді. Бірақ ЕуроОдақ өз ұстанымынан қайтпауға бекініп отыр.

Максим Прево, Бельгияның Сыртқы істер министрі:

- Бельгия еуропалық шенеуніктерге қатысты енгізілген шектеулерді түсіне алар емес. Цифрлық қызметтер туралы заңды ЕуроОдаққа мүше мемлекеттердің барлығы қолдады. Бұл заңнама АҚШ-пен жауластықтың белгісі емес. Оның мақсаты – виртуалды кеңістік шынайы өмір талап ететін қауіпсіздікке сай келуін қамтамасыз ету. АҚШ-тағы экономикалық мәселелердің кесірінен жеке тұлғаларға санкция енгізу дұрыс емес. Еуропа өз құндылықтры мен азаматтарын қорғау құқығын сақтайды.

X әлеуметтік желісіне 120 млн еуро айыппұл салынды    

Таяуда Еурокомиссия Х әлеуметтік желісіне заңды бұзғаны үшін 120 млн еуро айыппұл салды. Бұған жауап ретінде Х Еурокомиссияны жарнама жариялау мүмкіндігінен айырды. Ал көктем айында Apple 500 млн еуро, Мета компаниясы 200 млн еуро көлемінде айыппұл арқалады. Бұдан АҚШ айтарлықтай экономикалық шығынға ұшырай қоймайды. Бірақ цифрлық нарық ережелерін бақылаудан қағылды. Алпауыт америкалық платформалар еуропалық Заңына бейімделуге мәжбүр. Австралия, Жапония сынды өзге де мемлекеттер де осындай заң енгізу қарастырып жатыр. Бірақ, әзірге, ешқайсысы ЕуроОдақ сияқты ірі айыппұл салмады.

Визалық режим қатаңдатылды

Кейінгі айда Ақ үй басшысының туристік саясаты біршама күшейді. Визалық режим қатаңдатылып, 39 елдің азаматтарына АҚШ-қа кіруге тыйым салынды. Қаулы 1 қаңтардан бастап күшіне енеді. Ал бұған дейін маусым айында 19 елдің азаматтары Құрама Штаттар аумағына кіре алмайтыны белгілі болды. Сөйтіп жыл басынан бері Трамп әкімшілігі барлық санаттағы 85 мың визаны қайтарды. Бұл былтырғымен салыстырғанда екі есе көп. Визалардың күшін жоюына, көбінесе, құқық бұзушылықтар, соның ішінде мас күйде көлік жүргізу, ұрлық себеп болған.

Осы орайда Еуропа ішінде саяхаттау үшін тұрғындар келер жылы электронды рұқсат алуға тиіс болады. Сапарға шықпас бұрын онлайн түрде өтінім тапсырып, жеке деректерді ұсыну қажет. «Бұл ел ішіндегі қауіпсіздікті қамтамасыз етеді дейді», - билік басындағылар.