Фицо Мерцтің Украинаға ерекше мәртебе беру туралы ұсынысына пікір білдірді

АСТАНА, 28 мамыр – Sputnik. Словакия премьер-министрі Роберт Фицоның пікірінше, Украинаға Еуроодақ ішінде ерекше мәртебе беру үшін алдымен соғыс тоқтауы керек.

Бұған дейін Frankfurter Allgemeine Zeitung газеті Германия канцлері Фридрих Мерцтің Украинаға ЕО-ның ассоциацияланған мүшесі мәртебесін беріп, оған ЕО шарты бойынша өзара қорғаныс міндеттемесін қолдану туралы ұсыныс жасағанын хабарлаған.

"Біз алдымен ЕО-ға мүше болуға дайын үш ел (Сербия, Албания және Черногория) бойынша шешім қабылдайық, содан кейін ғана бейбіт келіссөз аясында ассоциацияланған мүше мәртебесі сияқты нәрсе ұсынылуы мүмкін. Украина, сен Еуропалық Одақта ассоциацияланған мүше мәртебесін аласың, бірақ осы мағынасыз соғысты тоқтату туралы келіссөзге дайын бол", - деді Фицо Словакия студенттерімен кездесу барысында.

Дүйсенбі күні Фицо Мерцтің Украинаға ерекше мәртебе беру туралы ұсынысы үлкен қарсылыққа тап болатынын айтқан болатын. Оның пікірінше, Киев Еуропалық Одаққа кіруге дайын тұрған басқа елдердің алдына түсіп кете алмайды, яғни олардан бұрын мүшелікке қабылданбауы керек.