Финляндияның экономикалық әлеуеті

Финляндия Еуроодақтағы экономикасы дамыған мемлекеттердің бірі. Біріккен Ұлттар ұйымының Адам дамуы индексі бойынша скандинав елі әлемде 12-орында.

Инновация, технология, білім салаларында озық тәжірибелерімен танымал.

Финляндия экономикасының негізгі табыс көзі - орман шаруашылығы. Ел аумағының 70 пайызы жасыл-желекке оранған. 70-80 жылдардан бастап ағаш өңдеу мен қағаз өнеркәсібі дамып, қазірде аталған сала бойынша әлемде көш бастап тұр. Сонымен қатар фин елі әлем халқына «мың көл елі» деген атаумен де танымал. Ел аумағының 10 пайызын 50 мыңнан астам көл алып жатыр. ЮНЕСКО-ның мәліметі бойынша Финляндия жер асты суларының сапасы бойынша әлемде бірінші орында. 

Финляндия экономикасы көбіне табиғи ресурстарды пайдалануға және сыртқы саудаға сүйенеді. Ел темірге, мысқа, мырышқа, кобальтқа және басқа да пайдалы қазбаларға бай. Металлургия, машина жасау, электроника мен химия салалары жақсы дамыған. Машина жасау экспорттың шамамен бестен бір бөлігін құрайды. Негізгі сатып алушы елдер – АҚШ, Швеция, Германия, Нидерланд және Қытай. Ал Фин еліне Германия, Швеция, Қытай, Норвегия мен АҚШ-тан мұнай, металл, ағаш, өнеркәсіптік жабдықтар мен кемелер импортталады. 

Финляндия тұмса табиғатымен және көрікті ландшафтымен ерекшеленеді. Қысқы туризм жақсы дамыған. Жыл сайын мыңдаған турист Солтүстік шұғыласын көруге арнайы барады. Жалпы Финляндия ең ең деген әлемдік рейтингтерде көш бастап келеді. Ең бақытты, ең қауіпсіз ел, жемқорлық көрсеткіші төмен. Бұдан бөлек PISA бағалауы бойынша білім сапасы жөнінен үздік 5 елдің қатарында.

Авторы: Фариза Жанғанаева