Ғажайыпқа толы Жаңа жыл: Көкшетауда Президент шыршасы өтті

Көкшетауда «Ғажайыпқа толы Жаңа жыл» атты Президент шыршасы өтті. 

Мерекелік кешке облыстың түкпір-түкпірінен 200 бала жиналды. Олар оқуда озат, спортта чемпион, өнерде дараланған және қоғамдық жұмыстарда белсенділік танытқан дарынды оқушылар. Жаңажылдық думанда олар ертегілер әлеміне саяхаттап, театрландырылған көріністі тамашалады.

Балалар жаңа жылдық кешті асыға күтеді. Ал олар үшін Президент шыршасына қатысу тіптен бөлек сезім. Себебі мұндағы мерекелік көңіл күй ерекше. Жылдағы дәстүрге сай биыл да шараға оқуда озат оқушылардан бөлек, әлеуметтік аз қамтылған отбасысының балалары, жетімдер мен мүмкіндігі шектеулі бүлдіршіндер жиналған.

Фируза Асылбекова, балаларды қолдау орталығының тәрбиеленушісі:

- Мен Ақкөл қаласынан келдім. Ақкөл қаласындағы үшінші мектепте оқимын. 4-5-ке оқимын. Мен осы жаңа жылға келгеніме өте қуаныштымын. Бірінші рет келіп тұрмын. Өте ерекше.

Темірлан Жандос, оқушы:

- Осы костюмді таңдаған себебім келесі жылы жылқы жылы болады. Сондықтан осы костюмді әдейі таңдадым. Барша халыққа айтарым, жаңа жыл құтты болсын. Жарқырай берейік. Қазақстанның туын желбірете берейік.

Мерекелік думанға қатысқан балғындардың ешқайсы жаңа жылдық сыйлықсыз қалған жоқ.  Өңір басшысы Марат Ахметжанов оқушылардың әрқайсына 120 мың теңге көлемінде ақшалай сыйақы  табыстап, Президенттің ыстық сәлемін жеткізді.

Марат Ахметжанов, облыс әкімі:

- Біздің Президентіміз Қасым-Жомарт Кемелұлы әрқашан да елдің болашағын ойлап, бүгін міне осы балаларға барша жағдай жасап жатыр. Жақсы заманауи мектептер салынып жатыр. Жақсы спорт нысандары бой көтеріп жатыр. Өйткені сіздер сапалы білім алсын деп, жақсы дене шынықтырып, осындай жақсылық жасалып жатыр. 

Мереке тек шыршамен ғана шектелген жоқ. Бағдарлама аясында жас қонақтар Көкшетаудың көрікті жерлерін аралауға мүмкіндік алды. 

Абзал Азаматұлы, Евгений Шинкаренко