Түркістанда дәстүрлі Президент шыршасы өтті

Мемлекет басшысы Қасым-Жомарт Тоқаевтың атынан ұйымдастырылған Жаңа жылдық кешке 200-ден астам бүлдіршін қатысып, қуанышқа бөленді.

Мерекелік жиында әр балаға сыйлықтар үлестіріліп, түрлі тәттілер таратылды.

«Ғажайыпқа толы Жаңа жыл!» атты шырша тойына әлеуметтік осал топтағы балалар мен оқу озаттары, спорт пен шығармашылықта жетістікке жеткен бүлдіршіндер шақырылды. Мерекелік шарада қазақ ертегілері мен онимациялық фильм кейіпкерлері балалардың көңілін көтерді. Шоу-қойылымдар шырша тойының шырайын кіргізіп, балаларға қуаныш сыйлады. Бүлдіршіндер де өз өнерін паш етті. 

Кәусар Сапаралы, Президент шыршасына қатысушы:

Бар жәндігін сүйемін қыбырлаған,

Бәрі маған: "Отан!" деп сыбырлаған

Жаным менің, Кеудемді жарып шық та,

Бозторғайы бол оның шырылдаған!

Әбдірахим Әзімхан, Президент шыршасына қатысушы:

- Мен осы жылы халықаралық Иран олипиадасының 3-орын игері болдым. Мені Аяз ата мен Ақша қардың ерекше киімі қызықтырды. Барлық қазақ халқының балаларына жаңа жыл құтты болсын!!!

Салтанатты жиында Түркістан облысының әкімі Нұралхан Көшеров бүлдіршіндерді мерекесімен құттықтады. Олардың жарқын болашағы – мемлекеттің басты құндылығы екенін атап өтті.

Нұралхан Көшеров, Түркістан облысының әкімі:

- Дәл қазір еліміз бойынша жаңа жылды өздеріңіздей 6 млн-нан астам бала қарсы алуда. Сіздер жаңа жыл қарсаңында киелі Түркістанның көрікті жерлерін аралап, тарихи орындармен таныстыңыздар. Бұл балалық шақтың жарқын естелігі болып жүректеріңізде сақталады деп сенемін. 

Шырша тойында бүлдіршіндерге Мемлекет басшысы атынан естелік хаттар мен түрлі тәттілер үлестірілді. Оқуда озат болып, білім олимпиадаларынан жүлде алған бірнеше оқушыға 100 мың теңге көлемінде ақшалай сыйақы табысталды.

Жандос Жұмабек, Ерболат Әбіш