Түркістанда халықаралық инвестициялық форум өтті

Былтыр Қазақстан және Қытай арасындағы тауар айналымы 30 млрд доллар болды. Оның ішінде 296 млн доллары Түркістан облысына тиесілі. Облыс құрылған жеті жыл ішінде қытайлық капиталдың қатысуымен жеті инвестициялық жоба жүзеге асты. Осы жайында Түркістандағы халықаралық инвестициялық форумда айтылды.

Халықаралық форумға Қытай және елімізден 300-ден астам ірі компания өкілдері қатысты. Алдымен қонақтарға отандық тауар өндірушілердің өнімі көрсетілді. Одан кейін инвесторларға дайын инфрақұрылымы бар ғимараттарды ұсынатын индустриалды аймақтағы шағын өнеркәсіптік парктер таныстырылды. Жиында облыс әкімі Нұралхан Көшеров өңірде инвестициялық жобаларды бірлесіп жүзеге асыруға үндеді. 

Нұралхан Көшеров, облыс әкімі:

- Ауыл шаруашылығы саласында көкөніс және жеміс-жидек дақылдарын, сүт өнімдерін, ет өнімдерін терең өңдеу бағытында бірлескен жобаларды жүзеге асыруға барлықтарыңызды шақырамын. Түркістан облысы табиғи жер қойнауы мен пайдалы қазбалары мен кен орындарына өте бай. Түркістан мен Қытай қалалары арасында туристік қарым-қатынасты нығайту үшін жаңа әуе компаниямен, туроператорды өңірімізге шақырамыз. 

Инвесторлар ауыл шаруашылығы, туризм, өндіріс, инфрақұрылым және әлеуметтік жобаларға қызығушылық танытты. Қытайлық «Qingdao Wanlin Group» компаниясы Түркістанда көкөніс өндіріп, одан әрі экспорттау үшін келісімге келгенін жеткізді. 

Ли Яньтао, «Qingdao Wanlin Group» компаниясының негізін қалаушы:

- Түркістанда көкөніс егіп, оны терең өңдеуге келістік. Ол үшін бізге арнайы экономикалық аймақтан ғимарат ұсынылды. Өңделген өнімдерді осында кептіріп, одан кейін Америка Құрама Штаттарына, Еуропа мен Таяу Шығыс елдеріне экспорттаймыз. Жоба құны 60 млн доллар. 

Форум барысында жалпы құны 432,2 млрд теңге болатын жеті ынтымақтастық меморандумына қол қойылды. Олар Қазақстан-Қытай индустриалды аймағын құру, джинс матасын өндіру, халықаралық текстиль орталығын құру, алюкацинк қағаздарын өндіру, ауыл шаруашылығы өнімдері, жарықтандыру жабдықтары мен күн панельдерін өндіру бағытындағы инвестжобалар.

Авторлары: Жандос Жұмабек, Қуаныш Абуов