Германиялықтардың 81% ы қоғамдық саяси жаңалықтарды тұрақты бақылап отырады

Жаңалықтар немістер үшін әлі де басты ақпарат көздерінің бірі болып қала береді. Ал сапалы жаңалық контентінің жанында жарнама орналастыру брендтер үшін қауіпсіз. Мұндай қорытындыға халықаралық маркетинг агенттігі Stagwell жүргізген «Германиядағы жаңалықтардың болашағы» атты зерттеу нәтижелері негіз болды. Сауалнамаға Германияның шамамен 11 мың ересек тұрғыны қатысты.

Зерттеу деректеріне сәйкес, немістердің 81 пайызы елдегі және әлемдегі өзекті оқиғаларды тұрақты түрде қадағалап отырады. Респонденттердің 35 пайызы жаңалықтар таспасын тәулігіне орта есеппен жеті рет қарап, күніне шамамен 10 мақала оқиды. Жаңалықтарға қызығушылық спорттық және ойын-сауық материалдарынан да жоғары: спортқа 25 пайыз, ойын-сауық тақырыптарына 15 пайыз ғана тұрақты назар аударады.

Сонымен қатар, немістердің 18 пайызы ел мен әлемдегі оқиғалар туралы ақпаратты белсенді әрі жүйелі түрде оқиды. Бұл көрсеткіш АҚШ пен Канадада – 11 пайыз, Ұлыбританияда – 10 пайыз, ал Азия-Тынық мұхиты аймағында – 9 пайыз. Сарапшылар мұны Германия қоғамының ақпараттық кеңістікке терең тартылғанымен және журналистикаға деген жоғары құрметімен байланыстырады.

Зерттеу жаңалықтарды тұтыну ерекшеліктерімен қатар, жаңалық ортасындағы жарнаманың қабылдануын да талдады. Нәтижелерге сәйкес, тіпті саяси немесе қылмыстық мазмұндағы материалдардың жанында орналастырылған баннерлер мен бейнероликтер бренд беделіне нұқсан келтірмейді және сатып алу ниетін төмендетпейді.

Сауалнамаға қатысқандардың 66 пайызы саяси немесе қылмыстық жаңалықтар жанындағы жарнаманы көргеннен кейін өнім сатып алуға дайын екенін білдірген. Ал ойын-сауық және спорт тақырыптары аясындағы жарнама бойынша бұл көрсеткіш 67 пайызды құраған. Әртүрлі жас топтары мен әлеуметтік санаттар арасында, соның ішінде зумерлер мен миллениалдар, жоғары табысты азаматтар мен жоғары оқу орнын бітіргендер арасында айтарлықтай айырмашылық байқалмаған.

Зерттеу қорытындысы қарапайым: немістер жаңалықтарды жиі оқиды, жарнама бұл ортада тиімді жұмыс істейді, сондықтан оны жаңалық контентінің жанында орналастырудан бас тартудың қажеті жоқ.

Германиядағы Axel Springer баспасының коммерциялық және маркетинг жөніндегі директоры Кристоф Эк-Шмидттің айтуынша, жаңалық медиасындағы жарнама спорттық немесе ойын-сауық сегментіндегі жарнамамен бірдей деңгейде әсер береді. Оның пікірінше, жаңалық ортасынан бас тартқан брендтер аудитория үшін «көзге көрінбейтін» болып қалуы мүмкін.

Германияда ірі брендтер әлі де дәстүрлі медианы – теледидарды, газеттер мен журналдарды басым бағыт ретінде сақтап отыр. Statista платформасының деректеріне сәйкес, 2025 жылы жарнама нарығында азық-түлік бөлшек саудасы көш бастаған. Одан кейін корпоративтік компаниялар мен онлайн-қызметтер орналасқан.

Сандық жарнама өсіп келе жатқанымен, дәстүрлі медиа жаппай аудиторияны қамтудың маңызды арнасы болып қала береді. Бұл сегментте теледидар алдыңғы орында тұр. Одан кейін сенімділік пен тұрақтылық ұсынатын баспасөз құралдары келеді. Жекелеген компаниялар арасында Германиядағы ең ірі жарнама беруші – америкалық Procter & Gamble компаниясы. Одан кейін Кёльн қаласында орналасқан Rewe супермаркеттер желісі тұр.

Германиядағы жаңалықтардың маңыздылығын халықаралық зерттеулер де растайды. Reuters Institute Digital News Report есебіне сәйкес, Германиядағы ересек онлайн-аудиторияның 45 пайызы жаңалықтардың басым бөлігіне сенеді. Әсіресе қоғамдық-құқықтық телерадио хабар тарату арналары мен жергілікті, өңірлік газеттер жоғары сенімге ие.

Жастар арасында әлеуметтік желілердің рөлі артып келеді. Ересектердің шамамен 33 пайызы Facebook, X немесе YouTube платформаларында жаңалықтарды қадағаласа, 18-24 жас аралығындағы жастар арасында бұл көрсеткіш 50 пайызға жетеді. Ал жаңалық іздеу үшін чат-боттарды тұрақты пайдаланатындар небәрі 4 пайызды құрайды.

Сонымен қатар зерттеу ересек интернет пайдаланушылардың 71 пайызы кейде жаңалықтарды әдейі қарамауға тырысатынын көрсеткен. Негізгі себеп – теріс ақпараттың эмоционалдық күйзеліске әкелуі.

Айта кетейік, Италияда толығымен жасанды интеллект арқылы жазылған алғашқы газет жарыққа шықты.