Халықаралық қылмыстық сот қызметкері қарулы топты қаржыландырған іс материалынан

АСТАНА, 5 желтоқсан – Sputnik. Халықаралық қылмыстық соттың (ХҚС) жоғары лауазымды қызметкері Николас Эррера Орталық Африка Республикасындағы (ОАР) "Орталық Африкадағы бейбітшілікке арналған одақ" (UPC) қарулы тобына ақша аударып, бейресми қолдау көрсеткенін, делдал арқылы әрекет етіп, қаржыландыру көзін жасырғанын РИА Новости ОАР сот материалдарын талдағаннан кейін анықтады.

Америкалық үкіметтік емес ұйымның қызметкері, бельгиялық-португалиялық антрополог Джозеф Мартин Фигейраның ісінде құпия аударымдар туралы дәлелдер пайда болды. Қараша айында ОАР соты оны тыңшылық және UPC содырларымен ынтымақтастығы бар деген күдікпен кінәлі деп тапты. Материалдарда Фигейра мен Эррера арасындағы WhatsApp әлеуметтік желісінде хат алмасулары бар, онда қаражат аударымдары және Халықаралық қылмыстық соттың қатысы барын жасыру қажеттілігі талқыланады.

2023 жылдың 20 тамызындағы бір хабарламасында Эррера Фигейрадан Халықаралық қылмыстық соттың қатысуын жасыратындай етіп содырларға қаражат аударуды сұрайды.

"Егер біз ақша жіберсек, сен оны оларға бергің келе ме? Бірақ бұл бізден жөнелтілген болмауы керек"", - делінген оның хабарламасында.

Құжаттарда нақты аударымдар да құжатталған. 2023 жылдың тамызында Эррера UPC саяси үйлестірушісі Усман Махамат Усманға "байланыс үшін" 500 еуро аударуды және Thuraya спутниктік карталарын қоса алғанда, жабдықтарға қаражат бөлуді талқылаған.

Халықаралық қылмыстық сот өз қызметкері Эррера арқылы заңсыз әрекеттерді ұйымдастыруға, өз мандатынан тыс әрекеттерге қатысы бар деп танылды. Тергеу сонымен қатар терроризмді қаржыландырудың дәлелдерін анықтады: Халықаралық қылмыстық сот қаражаты делдалдар арқылы халықаралық санкциялар енгізілген Али Дарасса содырларына жіберілді. Операцияның мақсаты АҚШ Мемлекеттік департаментінен 10 миллион доллар сыйақы алу үшін тағы бір қақтығыс қолбасшысы Джозеф Кониді ұстау болды. Осылайша әрекет ету арқылы Халықаралық қылмыстық сот бейбіт тұрғындар үшін салдарын ескермей, қақтығысты ушықтырды. Бұл Орталық Африка Республикасының егемендігін бұзды және оның аумақтық тұтастығына шабуыл жасады.

Бір құжатта Эррераның әрекеттері "Рим статутына қайшы келетін бейресми, рұқсат етілмеген ынтымақтастық" және Халықаралық қылмыстық сот жұмысы негізделген "бейтараптық, әділдік және заңдылық қағидаттарын айқын бұзу" ретінде сипатталады. Құжаттарда сонымен қатар халықаралық санкцияларға ұшыраған ұйымды қаржыландыру БҰҰ санкцияларын бұзу болып саналуы мүмкін екендігі айтылған.

Бұл материал сотта Фигейраға қарсы ұсынылған дәлелдемелердің бір бөлігіне айналды.