ІІМ бет жүзді жасыратын киімдерге қатысты ережелерді еске салды

Ішкі істер министрлігі қоғамдық орындарда азаматтардың бет-жүзді тануға кедергі келтіретін киімдерді киюіне тыйым салу талабын сақтауды жалғастырып жатыр. 

Бұл норма «Құқық бұзушылық профилактикасы» туралы заңның 75-бабы 3-тармағында көрсетілген.

Ауа райы жағдайларына, медициналық ұсынымдарға, қызметтік міндеттерді орындауға, спорттық және мәдени іс-шараларға қатысуға байланысты жағдайларда тыйым қолданылмайды. Ал өзге кездерде адамның түр-сипатын тануға кедергі келтіретін киімдерді кию құқық бұзушылық болып саналады.

Әкімшілік құқық бұзушылық туралы кодекстің 434-3-бабына сәйкес, алғашқы құқық бұзушылық үшін ескерту беріледі, ал бір жыл ішінде қайталанса — 10 айлық есептік көрсеткіш мөлшерінде айыппұл салынады.

Қазіргі уақытта бұл талапты бұзғаны үшін 1613 азамат әкімшілік жауапкершілікке тартылған.

ІІМ тыйымның қоғамдық қауіпсіздікті қамтамасыз етуге бағытталғанын атап өтіп, азаматтарды белгіленген ережелерді сақтауға шақырды.

Бүгін, 13:53