Импортталатын тауарларға ҚҚС төлеуді кейінге қалдыру механизмі бекітілді

Ұлттық экономика министрлігі қайта өңдеу үшін әкелінетін тауарлар тізбесін белгілеу туралы бұйрықты бекітті. Құжатқа сәйкес, аталған тізімге кіретін өнімдерді импорттаған кезде салық төлеушілер қосылған құн салығын кейінге қалдыру құқығына ие болады. Бұл норма Салық кодексінің 134-бабының 2-тармағында белгіленген талаптарға сәйкес айқындалды, деп хабарлайды Egemen.kz.

Фото: depositphotos.com

Министрліктің мәліметінше, тізімге Қазақстанда өндірілмейтін немесе ішкі нарық сұранысын толық қамти алмайтын, бірақ қайта өңдеу саласы үшін маңызды саналатын тауарлар енгізілген.

«Қабылданған бұйрық қайта өңдеу өндірісіне арналған шикізат пен компоненттерге қол жеткізеді. ҚҚС төлеуді кейінге қалдыру кәсіпорындарға қажетті тауарды әкелу кезінде айналым қаражатынан алмауға мүмкіндік береді. Осылайша олардың қаржысы тұрақты болмақ», делінген хабарламада.

Айта кету керек, аталған тізім Еуразиялық экономикалық одаққа мүше елдерден импортталатын тауарларға қолданылмайды.

ҚҚС төлеуді кейінге қалдыру тәртібі мен мерзімі салық және басқа да міндетті төлемдерді әкімшілендіруге жауапты уәкілетті орган белгілейді.