Индерде жол бойында велосипед тепкен бүлдіршіндер үйіне жеткізілді

Әлеуметтік желіде Индер ауданында екі кішкентай бүлдіршіннің көлік жүретін жолдың үстінде велосипед теуіп жүрген видеосы тарады. 

Полиция хабарлағандай, 28 наурыз сағат 15:00 шамасында Уәлиханов көшесіндегі бейнебақылау камералары арқылы жолды емін-еркін игеріп жүрген екі жас велосипедші көзге түскен. 

Балалардың бұл серуені жазатайым оқиғамен аяқталмауы үшін, оқиға орнына жақын маңда жүрген полиция қызметкерлері жіберілді. Тәртіп сақшылары балалардың ата-анасын анықтап, велосипед тепкен бүлдіршіндерді үйлеріне аман-есен жеткізді. Олармен және ата-аналарымен қауіпсіздік ережелері бойынша профилактикалық әңгіме жүргізілді.

Полиция қызметкерлері көлік жүретін жолдың маңындағы балалардың ойыны ауыр зардаптарға әкеп соғуы мүмкін екенін ересектерге тағы бір мәрте ескертті.

Ләззат ҚАРАЖАНОВА

Бүгін, 11:55