Индонезияда қайта оянған Семеру жанартауы 4 рет атқылады

Индонезияның Антара ақпарат агенттігінің мәліметінше, Шығыс Ява провинциясындағы Лумаджанг пен Маланг аудандарының шекарасында орналасқан Семеру жанартауы қайтадан белсенді бола бастады.

Семеру бақылау пункті жанартау қысқа уақыт ішінде төрт рет атқылап, күлді 600-ден 1 000 метрге дейін шашыратқанын хабарлады.

Атқылаулар кезінде ұзындығы 3,5 шақырымға жететін пирокластикалық ағын байқалды. Бұл ағын ыстық күл, газдар және тау жыныстарының сынықтарынан құралған. Сонымен қатар жанартау кратерінен мезгіл-мезгіл тау жыныстары құлап жатқаны тіркелді.

Индонезияның жанартау ескерту жүйесі Семеруге 3-деңгейлі дабыл жариялап, тау жыныстарының лақтырылуы қаупіне байланысты жанартау маңында 5 шақырым радиуста барлық әрекетке тыйым салды.

Айта кету керек, Семеру жанартауы Бромо Тенггер Семеру ұлттық саябағында орналасқан және Ява аралындағы ең белсенді жанартаулардың бірі саналады. Бұл аймақтағы жанартау белсенділігін бақылау және қауіпсіздік шараларын күшейту маңызды болып отыр.

Бұдан бұрын Камчаткадағы Шивелуч жанартауы теңіз деңгейінен 10 шақырым биікке күл атқылағанын хабарлағанбыз.