Интернет казиноны жарнамалаған танымал блогер Вьетнамнан экстрадицияланды

АСТАНА, 6 тамыз – Sputnik. Бас прокуратура Вьетнамнан Қазақстан азаматы экстрадицияланғанын мәлімдеді.

Тергеп-тексеру органының нұсқасы бойынша 2025 жылдың қаңтарында ол әлеуметтік желілер мен мессенджерлердегі ауқымды аудиторияны пайдалана отырып, сыйақы үшін заңсыз интернет-казино жарнамасын орналастырған және Қазақстан азаматтарын құмар ойындарына қатысуға тартқан.

"Интернет-казиноны насихаттағаны үшін оның криптовалюталық әмиянына 200 мың АҚШ доллары түскен", - деп жазылған хабарламада.

Жалпы, қылмыстық топтың қатысушылары 2021 жылдан бастап 2025 жылды қоса есептеген мерзімде Қазақстанда бірнеше заңсыз онлайн-казиноның қызметін ұйымдастырып, төлем терминалдары арқылы 106 млрд теңгеден астам қаражатты заңсыз иемденген.

"Осы орайда, қылмыстық топтың 9 сыбайлас қатысушысы қамауға алынғанын, ал қалғандарын, оның ішінде жоғарыда аталған күдіктіге де халықаралық іздестіру жарияланғанын атап өткен жөн", - дейді ведомство мамандары.

Биылғы маусымда Ішкі істер министрлігінің Интерпол Ұлттық орталық бюросының сауалы бойынша ол Вьетнам аумағында ұсталып, Бас прокуратураның сұрау салуы негізінде Қазақстанға экстрадицияланды.

Күдіктіге тағылып отырған айып бойынша оның мүлкi тәркiленiп, жетi жылға дейiнгi мерзiмге бас бостандығынан айыру жазасына кесілуі мүмкін.

Айта кетері, бұған дейін әлеуметтік желіде блогер Қайсар Қамзаның қолына кісен тағылған фотосы тараған болатын.