Ішімдік ішкен адамды көрсем, аяқ қолым дірілдейді : Айгүл Иманбаева жан сырын ақтарды (видео)

Әнші, актриса Айгүл Иманбаева зорлық-зомбылық тақырыбында сөз қозғады, – деп жазды Aikyn.kz.

Өнер иесі бұл тақырып өзі үшін ауыр екенін айтты. Сонымен қатар ата-аналарды балалардың көзінше жанжал шығармауға шақырды, бір-біріне қол көтермеуге шақырды..

Айгүл Иманбаева осыдан бірнеше жыл бұрын продюсер Баян Мақсатқызының зорлық-зомбылық туралы «Бақыт» фильміне басты рөлге шақырту алған. Алайда сценариймен танысқанда өзін жайсыз сезініп, бірден бас тартқан.

«Баяннан сценарийді сұрадым. Сценарийді оқып отырып, бұрынғы сырқаттарым оянды ма, білмеймін, аяқ-қолым дірілдеп, қатты жылап қалдым. Баянға хабарласып, бұл рөлден бас тарттым. Кейін режиссер Асқар Ұзабаев та қоңырау шалып, көндіруге тырысты. Оған да көзімнен жас тоқтамай, бұл тақырыптың мен үшін ауыр екенін айтып, жылап тұрмын. Ақырында ол мені жұбатып кетті. Бала кезімде әкемнің анамды ұрғанын, ата-анамның бір-бірімен жанжалдасқанын көрдім. Сондықтан қазір де біреу даусын көтерсе, қорқамын. Ішімдік ішкен адамды көрсем, аяқ-қолым дірілдейді. Психологпен жұмыс істеп, бәрін санамнан шығардым деп ойласам да, оның іздері әлі бар екен. Кейін сол жағдайлар өміріңде айна-қатесіз қайталануы мүмкін. Менің жеке өмірімде де сондай жағдайлар болды. Сондықтан бұл мәселені бала тәрбиесінен бөлек қарауға болмайды. Баланы өмірге әкелгеннен кейін оның тәрбиесіне жауапкершілік алу керек. «Тәрбие тал бесіктен басталады» деп бекер айтылмаған. Бүгінгі зорлық-зомбылық мәселесінің бір себебі бала кезден қалыптасқан түсініктерде жатыр деп ойлаймын», – деді актриса.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.